November 24, 2020
slider Ubukungu

Covid19:Guma mu Rugo yatumye ibiciro by’ibiribwa bigabanuka ibindi bibura isoko

Minisiteri y’Ubucuruzi n’Inganda (MINICOM) ivuga ko abaguzi b’ibiribwa babaye bake muri iki gihe, bitewe n’uko gahunda ya GumaMuRugo yatumye abantu bamwe bahunika mbere y’igihe abandi babura ubushobozi bwo kubigura none bimwe biri kwangirika ibindi biragura make.

Ni bintu byemezwa na bamwe mu bahinzi aho bagaragaza ko hari ibiribwa byibasiwe n’izi ngorane zatewe n’icyorezo cya Covid19 zirimo izo gutuma abacuruzi bato baranguraga ibyo bejeje, batabona aho banyura kubera gahunda ya Guma mu Rugo.

Baharakubuye Janvier Umuhinzi w’ibirayi n’imboga mu karere ka Rubavu aho avuga ko ibiciro bya bimwe mu biribwa Leta yashyizeho bishobora kudahindagurika, ariko ko abahinzi bato bato b’imbuto, imboga n’ibindi bitashyirweho ibiciro, ngo bashobora kubura isoko, umusaruro wabo ukabapfira ubusa.

Avuga ko ibi byatizwa umurindi n’uko hari abacuruzi bato bato b’ibiribwa batinya kujya kubishaka no kubijyana ku masoko manini, bitewe n’uko na bo bari mu basabwa kuguma mu rugo.

Ati “Nk’ibirayi byo nta kibazo bifite kuko bakoze amakoperative abicuruza, bikaba binyura mu nzira zaciwe na Leta bikagera ku masoko manini, ariko imboga nk’izi za beterave zijyanwa mu masoko mato mato adafatika.

Ku isoko rinini abaguzi b’imboga n’imbuto bashobora kuboneka kuko bakoze amakoperative, ariko hasi nta bahari, hakaba havuka ikibazo cy’igiciro gito(ku biribwa byeze ), kereka ahari ababigemuraga ku masoko manini bagiye bahabwa ibyemezo bituma batagirira ikibazo mu nzira”.

Karangwa Cassien Umuyobozi muri MINICOM ushinzwe ubucuruzi bw’imbere mu gihugu, avuga ko ibiribwa bitarimo kugurwa ahanini ari ibidashobora kubikwa igihe kirekire.

Akomeza agira ati “Ahantu ibirayi bya Kinigi byagurwaga amafaranga 400-500 nko mu isoko rya Kimironko, ubu biragurwa amafaranga 350, ariko ahandi bikagurwa 300 cyangwa 310.
Impamvu ibiciro byagabanutse ni uko cya gihe twabwiraga abantu ko batazafunga (ahacururizwa ibiribwa), harimo abihutiye kugura ibiribwa bibikika nka kawunga, umuceri,…bikaba ari byo bagura byinshi“.

Akomeza agira ati“Habayeho guhahira rimwe bituma umuntu wabiguze asigara agura ibindi bike akeneye, icyakora hari n’ikijyanye n’ubushobozi kuko abantu bahahaga bari gufashwa na Leta n’abagiraneza”.

Kuri iyi ngingo,umuyobozi w’ishami ry’Umuryango w’Abibumbye ryita ku biribwa (FAO) mu Rwanda, Otto Muhinda, avuga ko ku bufatanye n’inzego z’ibanze, barimo gutegura kujya batanga amafaranga ku bacuruzi bo mu cyaro bakusanya ibiribwa aho byeze, bakabishyira abaturage barimo gufashirizwa mu ngo.

 

Related posts

U Rwanda na USA basinyanye amasezerano y’ubufatanye mu bya gisirikare [Amafoto]

Chief Editor

Ntibizagutangaze umunsi tuzaba tumufite hano-Perezida Kagame avuga Padiri Nahimana wirirwa “amubika”

Chief Editor

Ibikorwa by’ubukerarugendo n’inama mu mahoteli byasubukuwe (ibyemezo by’inama y’Abaminisitiri)

Chief Editor

Leave a Comment