November 28, 2020
slider Ubuzima

Mu Rwanda umupolisikazi yahitanwe na Covid-19

Minisiteri y’Ubuzima yatangaje  undi muntu wa kabiri witabye Imana azize Icyorezo cya Covid-19 mu gihe abarwayi  7 bakize abandi 7 bakaba aribo basanganwe ubwandu bwa Coronavirus itera Covid-19.

Umurwayi witabye Imana yari Umupolisikazi w’Imyaka 24 wari mu butumwa bw’akazi mu mahanga aho yanduriye Coronavirus aza kugarurwa mu Rwanda amaze kuremba.

Icyo gihe yahise yitabwaho n’abaganga ariko yaje kwitaba Imana azize uburwayi bukomeye.

Uyu abaye uwa kabiri nyuma y’undi murwayi uherutse guhitanwa n’iki cyorezo nyuma yuko yari avuye mu mahanga.

Minisante yatangaje ko habonetse abarwayi 7 ba Covid-19 mu bipimo 957 byafashwe , ibi byatumye abarwayi bose hamwe baba 384. Ni mu gihe kandi abanda 7 bakize Covid-19 umubare w’amaze gukira ukaba ari 269.

Minisiteri y’Ubuzima ivuga ko umubare w’abakirimo kwitabwaho n’abaganga ari 113, mu barwayi bose bamaze kuboneka mu bipimo 70,108 byafashwe kuva umurwayi wa mbere yatahurwa muri Werurwe kugeza ubu.

Abarwayi bashya bose bahise bashyirwa mu kato bakihagera, ndetse n’abakirwaye muri rusange bakomeje kuvurirwa ahabugenewe.

Igikorwa cyo gupima abantu mu buryo bwa rusange mu Gihugu kirakomeje, mu minsi ibiri ishize hakaba harabonetse ubwandu bushya mu Karere ka Rusizi gahana imbibe n’Igihugu cya Repubulika Iharanira Demokarasi ya Congo.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 136,677 barimo 56,958 bakize n’abandi 3,941bahitanywe na cyo. Abamaze kwandura ku Isi bangana na 6,470,285 barimo abakize 2,984,522 na 381,624 bapfuye.

Related posts

Ibiciro by’ingendo byiyongereyeho 47% ku byari bisanzwe

Chief Editor

Rwamagana:Barasabwa kugira umuco wo gukaraba intoki haba ahahurira abantu benshi ndetse n’iwabo

Chief Editor

Nyabihu:Ababyeyi batwitse umwana wabo bamuziza kwiba amafaranga akagura amandazi batawe muri yombi

Chief Editor

Leave a Comment