November 25, 2020
Hanze

Kim Jong-un yashimagije intsinzi igihugu cye gikomeje kugira mu kurwanya covid-19

Kim Jong-un, umutegetsi mukuru wa Koreya ya ruguru, yashimagije igihugu cye ku “ntsinzi ikomeye” cyagize mu guhangana n’icyorezo cya coronavirus, nkuko bitangazwa n’ibiro ntaramakuru KCNA bya leta.

Mu ijambo yavugiye mu nama ya biro politike y’ishyaka ritegeka Koreya ya ruguru, Kim yavuze ko iki gihugu “cyakumiriye kuza kwa virusi mbi” ndetse gishobora “kugumishaho ituze”.

Mu mezi atandatu ashize, Koreya ya ruguru yafunze imipaka yayo ndetse ishyira mu kato abantu babarirwa mu bihumbi ubwo iyi virusi yari itangiye gukwirakwira ku isi.

Iki gihugu kivuga ko nta muntu n’umwe wanduye coronavirus ukirangwamo, nubwo abasesenguzi bavuga ko ibyo bisa nk’ibidashoboka.

CNN itangaza ko Kim, muri iyo nama yo kuri uyu wa kane tariki 2 Nyakanga, “yasesenguye byimbitse ibikorwa byagezweho na gahunda idasanzwe y’amezi atandatu yo kwirinda icyorezo”.

Yavuze ko intsinzi mu kurwanya iki cyorezo “yagezweho kubera ubuyobozi bureba kure bw’akanama gakuru k’ishyaka” riri ku butegetsi.

Ariko yashimangiye akamaro ko kugumishaho “kuba maso ku kigero cyo hejuru gishoboka… nta koroshya ingamba zo kurwanya icyorezo”.

Yongeyeho ko icyorezo cya coronavirus kikigaragara mu bihugu bituranyi.

Kuri uyu wa gatanu, ibiro ntaramakuru KCNA bya leta ya Koreya ya ruguru byatangaje ko “yakomeje kuburira ko guhutiraho mu koroshya ingamba zo kurwanya icyorezo byateza akaga umuntu adashobora kwiyumvisha kandi katakwikurwamo”.

Agapfukamunwa ni itegeko

Mu mpera y’ukwezi kwa mbere, Koreya ya ruguru yihutiye guhangana na coronavirus – ifunga imipaka yayo ndetse nyuma yaho ishyira mu kato abanyamahanga babarirwa mu magana, mu murwa mukuru Pyongyang.

Yanashyize mu kato abaturage bayo bwite babarirwa mu bihumbi za mirongo ndetse ifunga amashuri.

Kuri ubu Koreya ya ruguru yongeye gufungura amashuri, ariko yagumishijeho itegeko ribuza abantu guterana mu kivunge.

Yanategetse kwambara agapfukamunwa mu ruhame, nkuko inkuru y’ibiro ntaramakuru Reuters yo ku itariki ya mbere y’uku kwezi kwa karindwi ibivuga, isubiramo amagambo y’umutegetsi wo mu ishami ry’umuryango w’abibumbye ryita ku buzima (OMS/WHO).

OMS inavuga ko iki gihugu – gituwe n’abaturage barenga gato miliyoni 25 – kugeza ubu kimaze gupima coronavirus abantu 922 gusa – amakuru akavuga ko bose basanze ari bazima.

Koreya ya ruguru, ihana urubibi rurerure n’Ubushinwa, yakomeje kuvuga ko nta muntu n’umwe urahaboneka wanduye coronavirus.

Related posts

Koreya y’Epfo:coronavirus yatumye kiliziya n’ibikorwa bihuriramo abantu benshi bifunga imiryango

Chief Editor

Burundi:Abarundi baba hanze y’igihugu ntabwo bazitabira amatora y’umukuru w’igihugu

Chief Editor

Perezida Poutine avuga ko azakomeza kurwanya abatinganyi n’ubutinganyi mu gihugu cye

Chief Editor

Leave a Comment