November 24, 2020
Ubutabera

Rwamagana:Yaguwe gitumo arimo yambura abaturage amafaranga yiyise umupolisi

Nzabihimana Jean Pierre w’imyaka 33 yafatiwe mu murenge wa Rubona arimo akagenda yambura abaturage amafaranga yiyise umupolisi amaze kwambura abantu ibihumbi 35Frw.

Nzabihimana yafashwe kuri uyu wa Gatatu tariki ya 29 Nyakanga nyuma y’uko abaturage bari batanze amakuru Yari amaze kwambura abaturage batatu, bose hamwe akaba yari amaze kubambura amafaranga y’ u Rwanda ibihumbi 35.

 

Umuvugizi wa Polisi mu ntara y’Iburasirazuba, Chief Inspector of Police (CIP) Hamdun Twizeyimana yavuze ko kugira ngo Nzabihimana afatwe byaturutse ku makuru yatanzwe n’abaturage yari amaze kwambura.

 

CIP Twizeyimana yagize ati   “Abaturage bahamagaye kuri sitasiyo ya Polisi iri mu murenge wa Rubona babwira abapolisi ko hari umuntu urimo kugenda abakangisha ko ari umupolisi kandi ko nibatamuha amafaranga arabafunga. Yababwiraga ko azahera ku barenga ku mabwiriza ya Leta yo kurwanya icyorezo cya COVID-19.”

Polisi n’urwego rw’ubugenzacyaha bakimara kumenya ayo makuru bahise batangira gushakisha Nzabihimana, bamufatira mu cyuho arimo kwaka amafaranga umwe mu baturage bo mu murenge wa Rubona.

Umuvugizi wa Polisi mu ntara y’Iburasirazuba yashimiye abaturage batanze amakuru asaba n’abandi kudahishira abanyabyaha. Yabagaragarije ko serivisi za Polisi zitakirwa ikiguzi kuko zitangwa biciye mu mucyo. Bityo uzajya abaka amafaranga bajye babanza bashishoze.

Itegeko nº68/2018 ryo ku wa 30/08/2018 riteganya ibyaha n’ibihano muri rusango ingingo ya 174 ivuga  ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarenze imyaka itatu (3) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW).

Related posts

Rwamagana:Umugabo yakubise mudugudu umugeri wo munda amumenaho n’inzoga

Chief Editor

Rubavu:Umusore yafashwe yinjiza mu Rwanda udupfunyika tw’urumogi hafi 600

Chief Editor

Rusizi:Umuyobozi wa GS Muramba yatawe muri yombi akekwaho kwiba sima zagenewe kubaka ibyumba by’amashuri

Chief Editor

Leave a Comment