Nyabimata ni kamwe mu duce two mu Ntara y’Amajyepfo twagabweho ibitero n’umutwe wa FLN ushamikiye ku ishyaka MRCD rya Rusesabagina, byahitanye abantu icyenda ndetse bikanakomerekeramo abantu benshi.

Mu ijoro ry’itariki ya 19 rishyira iya 20 Kamena, ni bwo inyeshyamba za FLN zagabye igitero i Nyabimata, zica abantu babiri, abandi batandatu barimo n’uwari Umunyamabanga Nshingwabikorwa w’uriya murenge wanatwikiwe imodoka barakomereka.

Abatuye muri kariya gace bemeza ko bishimiye cyane ifatwa rya Rusesabagina, bakifuza ko byaba byiza bamubonye amaso ku maso.

Uwitwa Cyimana Emmanuel yagize ati: “Nibaze, abo banzi b’amahoro nibaze tubabone. Aho bajya hose uyu muyobozi wa FPR azabakuraho pe, kuko yarabanye, abana n’amahanga yose Isi yose iramwemera.”

Yunzemo ati: “Ubu turaryoshye tumeze neza, ni uko ari iki cyorezo cyadufungiye, ubu tuba tugiye kubakira. Twishimye umuyobozi yaduhaye icyo gisambo kitubuza umutekano ngo turimo turubaka, naze hano i Nyabimata tumubone.”

Uyu musaza w’imyaka 80 y’amavuko yavuze ko akeneye kubaza Rusesabagina wamurashe isasu ku gutwi icyo yamuhoraga, cyangwa icyo yari yabuze mu gihugu bigatuma agenda agisebya.

Mu gihe igitero cya Nyabimata cyabaga, Havugimana Jean Marie usanzwe ukora umwuga wo gutwara abagenzi kuri moto, yatwikiwe moto ndetse inyeshyamba zimwikoreza imizigo zari zasahuye. Yemeza ko inyeshyamba zamubwiye ko niyibeshya akazirwanya ziri bumurase.

Aganira n’umunyamakuru wa RBA yagize ati: “Moto yanjye barayitwitse, barambwira ngo nanjye ninibeshya nkabarwanya barandasa. Twageze mu Mumenero mugasantere baca inzugi, barasahura ibintu n’amayoga byose bavangavanga n’amata, barangije baratuzamukana.”

Havugimana yavuze ko kubera uburemere bw’umuzigo yari yikoreye, hari ubwo yaguye inyeshyamba imwe ikamusabira ko bamurasa, gusa bikarangira Imana ikinze akaboko.

Ku bw’uyu mugabo cyo kimwe na bagenzi be, ngo kuba Rusesabagina na bagenzi be bakomeje gufatwa bagatabwa muri yombi umusubirizo, ni ikimenyetso simusiga kiranga ubuyobozi bushoboye, n’ubutumwa bukomeye ku bifuza kugirira nabi u Rwanda.

Rusesabagina watawe muri yombi ku wa mbere w’iki cyumweru, akurikiranweho ibyaha bitandukanye birimo iterabwoba, gutwika, kwica no gushimuta abantu. Ni byaha yashinjwe kugiramo uruhare rukomeye na Nsabimana Calixte ’Sankara’ wari umuvugizi wa FLN, nyuma yo gufatirwa mu birwa bya Comores n’inzego zishinzwe umutekano.