November 27, 2020
Hanze

USA: Perezida Trump yajyanwe mu bitaro igitaraganya

Perezida Donald Trump wa Leta Zunze Ubumwe z’Amerika, urimo guhinda umuriro, yajyanywe n’indege ya kajugujugu mu bitaro nyuma yuko asanzwemo Covid-19.

Ibiro bye bya White House byatangaje ko perezida “ananiwe cyane ariko afite akanyamuneza” ndetse ko yajyanwe mu bitaro nk’uburyo bwo kwigengesera.

Akiri muri White House, Bwana Trump yatewe urushinge rw’umuti w’imvange ukiri mu igeragezwa nyuma yuko we n’umugore we Melania Trump babasanzemo Covid-19.

Bishobora kumuviramo n’ikibazo mu matora asigaje ukwezi kumwe ngo abe, kuko n’ubundi yari asanzwe arushwa amahirwe menshi yo gutorwa na Joe Biden bahatanye wo mu ishyaka ry’abademokarate, nkuko imibare y’amakusanyabitekerezo ibigaragaza.

Uko Trump yagaragaye gute ejo ku wa gatanu?

Yambaye agapfukamunwa na ‘costume’, Bwana Trump ejo ku wa gatanu nyuma ya saa sita zaho yateye intambwe yambukiranya uruhande rumwe ajya mu rundi, yerekeza kuri kajugujugu izwi nka Marine One yari mu busitani bwa White House.

Yari ajyanwe ku bitaro bya gisirikare bitari kure yaho bya Walter Reed National Military Medical Center, mu nkengero ya Washington DC.

Yapepeye abanyamakuru ndetse, akoresheje urutoki rw’igikumwe ruzamuye, abereka ko ameze neza, ariko nta kintu yavuze, mbere yuko yinjira muri iyo ndege.

Mu butumwa bwa videwo yatangaje kuri Twitter, Bwana Trump yagize ati:

“Ndatekereza ko meze neza cyane. Ariko tugiye gukora kuburyo ibintu bigenda neza. Madamu ameze neza cyane. Rero murakoze cyane”.

Ivanka na Eric, abana na Perezida Trump, na bo batangaje ubwo butumwa bwe mu buryo bwa ‘retweet’, bamushimagiza ko ari “indwanyi”.

Ivanka yongeyeho ati: “Ndagukunda papa”.

Muri ibyo bitaro bya gisirikare bya Walter Reed, Bwana Trump yashyizwe mu gice cyagenewe kuvurirwamo perezida. Aho ubusanzwe ni ho ba perezida b’Amerika bajya kwisuzumisha buri mwaka.

Nyuma gato ya saa sita z’ijoro zaho, Bwana Trump yongeye kwandika kuri Twitter ati: “Birimo kugenda neza, ni ko mbitekereza. Murakoze mwese. NDABAKUNDA!!!”

Indege ya kajugujugu ya Marine One mu busitani bwa White House itegereje Perezida Trump

Related posts

Uruhinja rw’umunsi umwe n’amasaha atandatu barusanzemo coronavirus

Chief Editor

Burundi:Perezida Ndayishimiye yambitse umudari abarimo umuhungu wa Nkurunziza n’umusirikare wapfuye barwana n’u Rwanda

Chief Editor

Uganda:Umurundo w’abapolisi n’abasirikare biraye mu bagore barabasebya biteye n’ubwoba [Reba amafoto]

Chief Editor

Leave a Comment