November 23, 2020
Politiki slider

Ibibazo byavumbuwe na PAC byatumye abadepite bahamagaza abaminisitiri banaha umukoro MUNIJUST

Inteko Rusange y’Umutwe w’Abadepite iyobowe na Perezida w’Inteko Ishinga Amategeko Umutwe w’Abadepite Mukabalisa Donatille, yagejejweho raporo ya Komisiyo ishinzwe Gukurikirana Imikoreshereze y’Imari n’Umutungo by’Igihugu (PAC) ku isesengura rya raporo y’Umugenzuzi Mukuru w’Imari ya Leta y’umwaka w’ingengo y’imari wa 2018/2019.

Perezida wa Komisiyo ya PAC Muhakwa Valens, yabwiye Inteko Rusange, ku wa Kane tariki ya 12 Ugushyingo 2020, ko mu gukora iyi raporo, hagenzuwe inzego zigenerwa ingengo y’imari (Budget agencies) 174. Izi nzego zakoresheje ingengo y’imari ingana na 87.1% ugereranyije na 86.6% y’umwaka ushize.

Muhakwa yavuze ko mu gikorwa cyo kubariza mu ruhame, habajijwe inzego 65 harimo Minisiteri ebyiri, Ibigo bya Leta 22, Uturere 26 n’Umujyi wa Kigali, Ibitaro 12 na porogaramu za Leta ebyiri.

Imwe mu myanzuro yafashwe n’Inteko Rusange y’Umutwe w’Abadepite, harimo gutumiza Minisitiri w’Imari n’Igenamigambi Dr. Ndagijimana Uzziel, agatanga ibisobanuro mu magambo ku bibazo bimaze igihe bigaragara mu ibaruramari n’ishoramari by’Ikigo cy’Ubwiteganyirize mu Rwanda (RSSB).

Abadepite bafashe umwanzuro wo gutumiza Minisitiri w’Uburezi Dr. Uwamariya Valenntine agatanga ibisobanuro mu magambo ku bibazo bimaze igihe bigaragara muri Kaminuza y’u Rwanda Koleji ya Huye, bijyanye n’imicungire y’imari n’umutungo n’ikoranabuhanga rya IEBMIS ritabyazwa umusaruro.

Abadepite bafashe umwanzuro wo gutumiza Minisitiri w’Ibikorwa Remezo (MININFRA) Amb. Gatete Claver, agatanga ibisobanuro mu magambo ku bibazo bimaze igihe bigaragara mu Ikigo k’Igihugu gishinzwe gukwirakwiza amazi, isuku n’isukura (WASAC)n’ Ikigo k’Igihugu gishinzwe Ingufu (REG Ltd) birimo iby’imiyoborere, imikorere, imicungire y’imari n’umutungo ndetse n’ibikoresho bidakoreshwa.

Abadepite basabye Minisiteri y’Ubutabera (MINIJUST) gusaba Ubushinjacyaha Bukuru gukurikirana abagize uruhare mu makosa yo kudaha agaciro ubusesenguzi bwakozwe na na Komite y’Ishoramari ndetse n’Itsinda rishinzwe ubugenzuzi (investment committee & monitoring team) kuri bibazo byagaragajwe mu mishinga yahawe ingwate, byatumye Ikigega k’Ingwate mu Rwanda (BDF) kishyura amafaranga y’u Rwanda asaga miriyoni 548 n’ibihumbi 470 ku mishinga yahombye.

Minisiteri y’Ubutabera kandi yasabwe gusaba Ubushinjacyaha Bukuru gukurikirana abagize uruhare mu makosa yo gutanga ingwate ku batari babyemerewe ku mishinga 13 harimo n’abanyamahanga, bigaruma BDF igomba kwishyura amafaranga y’u Rwanda asaga miriyari na miriyoni 39 y’indishyi (compensation) ku mishinga 6 yahombye.

MINIJUST kandi yasabwe gusaba Ubushinjacyaha Bukuru gukurikirana abagize uruhare mu gutuma hari amafaranga ajyanye n’ubukerarugendo angana n’Amadorari y’Amerika 408,486 (ahwanye n’amafaranga y’u Rwanda 363,303,364) yishyuwe hagati y’ukwezi kwa Kanama 2018 na Mutarama 2019 ataragejejwe kuri konti y’Urwego rushinzwe Iterambere mu Rwanda (RDB).

Abadepite basabye MINIJUST gusaba Ubushinjacyaha Bukuru gukurikirana ibibazo by’imitangire y’amasoko byagaragaye mu turere twa Gatsibo, Ngororero, Nyabihu, Nyamasheke, Rutsiro, Karongi, Muhanga na Musanze.

Inteko Rusange y’Umutwe w’Abadepite yasabye Minisitiri w’Intebe kuyishyikiriza, mu gihe kitarenze amezi 8, raporo irambuye igaragaza uko ibyemezo byasabwe gufatwa muri raporo ya PAC byashyizwe mu bikorwa.

Related posts

Drones zashyizweho mu gukaza ubukangurambaga bwo kwirinda covid19 [Reba amafoto]

Chief Editor

Perezida Kagame yasuye ibice biherutse kwibasirwa n’ibiza nyuma y’ubutumwa yohereje[Amafoto]

Chief Editor

Kiyovu Sports yarahiye ko igiye kujyana APR FC mu nkiko iyishinja kuyitwara umukinnyi

Chief Editor

Leave a Comment