Perezida wa Basketball Africa League (BAL), Amadou Gallo Fall, yatangaje ko Abanyarwanda bamaze guhitamo andi makipe bazashyigikira, nyuma y’aho APR BBC, isezerewe idakinnye imikino ya nyuma y’iri rushanwa.
Iyi mikino iteganyijwe gutangira ku wa Gatanu, tariki 24 Gicurasi 2024,muri BK Arena.
Mu kiganiro n’abanyamakuru cyo kuri uyu wa Kane, abategura BAL basobanuye aho imyiteguro igeze ndetse no gutangiza imikino ya nyuma y’iri rushanwa rigiye kubera i Kigali ku nshuro ya kane.
Ni ikiganiro cyitabiriwe n’abarimo Amadou Gallo Fall uyobora BAL, Umuyobozi Mukuru wa NBA Africa, Clare Akamanzi, Umuyobozi wa FIBA Africa, Anibal Manave ndete n’Umunyamabanga Uhoraho muri Minisiteri ya Siporo, Niyonkuru Zephanie.
Perezida wa BAL, Amadou Gallo Fall, yatangaje ko imyiteguro yarangiye, amakipe yose azakina irushanwa ahari kandi yiteguye guhiganwa.
Abanyamakuru bamubajije niba nta mpugenge nk’ubuyobozi bwa BAL bufite ku bijyanye n’ubwitabire cyane ko bwa mbere mu mateka muri iyi mikino nta kipe yo mu Rwanda izaba irimo.
Amadou Gallo Fall yatangaje ko ntampugenge bafite ahubwo Abanyarwanda bamaze guhitamo andi makipe bazashyigikira.
Ni ku nshuro ya kane yikurikiranya u Rwanda rugiye kwakira imikino ya nyuma ya BAL, aho bitandukanye n’imyaka itatu ishize hazabanza gukinwa imikino yo kumenya uko amakipe azakurikirana bityo habone gukorwa tombora y’uko azahura muri ¼ (Seeding games).
Umukino ufungura uteganyijwe ku wa Gatanu, tariki 24 Gicurasi 2024, ukazahuza Al Ahly (Libya) na Cape Town Tigers (Afurika y’Epfo) saa 17:00, uzakurikirwa ni uwa Al Ahly (Egypt) na FUS de Rabat (Maroc) uteganyijwe saa Mbiri z’Ijoro.
