Mu myaka 5 ishize hatangiye gahunda yo gusaranganya inyungu iva mu bukerarugendo abaturiye Pariki y’Igihugu ya Gishwati Mukura ndetse kuva icyo gihe bamaze guhabwa asaga miliyari 2 Frw.
Abegereye iyi pariki bemeza ko imishinga yashyizweho yahinduye ubuzima bwabo ndetse bibakundisha kubungabunga urusobe rw’ibinyabuzima.
Umwe mu mishinga ikomeye washibutse ku gusaranganya inyungu iva mu bukerarugendo ni uwa miliyoni 600 Frw wo kubaka Ikigo Nderabuzima cya Mwendo mu Murenge Mukura ndetse imirimo igeze kure.
Ahari hubakwa Ikigo Nderabuzima cya Mwendo hahoze ari ivuriro rito [poste de santé].
Abatuye muri aka gace bayivurizagaho bemeza igihe izaba yabaye ikigo nderabuzima bizabafasha kubonera hafi serivisi nyinshi bajyaga gushaka kure ku Kigo Nderabuzima cya Mukura bibasabye no guca muri pariki.
Uretse ikigo nderabuzima kiri kubakwa, muri uyu murenge hari na Koperative y’abahinzi iri mu zagezweho n’inyungu ziva mu bukerarugendo kuko yatewe inkunga yubakirwa greenhouse igezweho izatuburirwamo imbuto.
Ubuyobozi bwa Pariki ya Gishwati Mukura butangaza ko gusaranganya inyungu ziva mu bukerarugendo ku baturiye pariki bituma abaturage bumva uruhare rwabo mu kuyibungabunga.
Imibare y’Urwego rw’Igihugu rw’Iterambere, RDB, igaragaza mu myaka 5 ishize gahunda yo gusaranganya inyungu iva mu bukerarugendo abaturiye Pariki ya Gishwati-Mukura itangiye, asaga miliyari 2Frw yasaranganyijwe akoreshwa mu mishinga y’iterambere n’imibereho by’abayituriye.