Abayobozi batandukanye bashimiye Kagame wongeye gutorerwa kuyobora u Rwanda

Perezida wa Kenya William Ruto yashimiye Perezida Kagame (Ifoto yo mu bubiko)

Perezida wa Kenya William Ruto, mu butumwa yanyujije ku rukuta rwe rwa X, yashimiye Perezida Paul Kagame, ashima n’amahitamo y’Abanyarwanda.

Yagize ati: “Mu izina ry’abaturage na Guverinoma ya Kenya, nejejwe no kubashimira byimazeyo kuba mwongeye gutorerwa indi manda nka Perezida wa Repubulika y’u Rwanda.”

Ruto yakomeje agira ati: “Turishimira amahitamo aboneye y’Abanyarwanda, tukwifuriza intsinzi mu rugendo ruganisha Igihugu ku mahoro, ituze n’iterambere.”

Perezida Samia Suluhu wa Tanzania ari mu boherereje Kagame ubutumwa bw’ishimwe (Ifoto yo mu bubiko)

Perezida wa Tanzania, Samia Suluhu Hassan, na we yashimiye Paul Kagame wongeye gutorerwa kuyobora u Rwanda, anamwizeza gukomeza gukorana mu guteza imbere umubano w’ibihugu byombi no guharanira ubumwe n’ubusugire bw’Umuryango wa Afurika y’Iburasirazuba.

Perezida wa Mozambique Filipe Jacinto Nyusi na we yashimiye Perezida Kagame (Ifoto yo mu bubiko)

Perezida wa Mozambique Filipe Jacinto Nyusi, na we yifurije ishya n’ihirwe Paul Kagame muri manda y’imyaka itanu iri mbere. Perezida wa Guinea-Bissau, Umaro Sissoco Embaló, Perezida wa Madagascar Andry Rajoelina, na bo bashimiye Paul Kagame.

Perezida Kagame na Andry Rajoelina wa Madagascar (Ifoto yo mu bubiko)

Mu bandi bayobozi bashimiye Paul Kagame, harimo Minisitiri w’Intebe wa Ethiopia, Abiy Ahmed Ali.

Minisitiri w’Intebe wa Ethiopia Abiy Ahmed Ali na we yashimiye Perezida Kagame (ifoto yo mu bubiko)

Prezida w’Igihugu cya Madagascar Rajoelina yashimiye ko Perezida Kagame yatsinze amatora y’umukuru w’Igihugu yabaye ku wa Mbere taliki 15 Nyakanga 2024.