Ambasaderi w’u Buyapani mu Rwanda, Isao Fukushima ari kumwe n’umuyobozi mukuru uhagarariye mu Rwanda ishami ry’Umuryango w’Abibumbye rishinzwe iterambere basuye ikigo cy’igihugu cy’Amahoro kiri mu Karere ka Musanze, Rwanda Peace Academy.
Uru rugendo rwari rugamije gukomeza umubano n’ubufatanye muri gahunda zitandukanye zirimo amasomo, n’ubushakashatsi ku kugarura amahoro no gufasha abitegura kujya mu butumwa bw’Umuryango w’Abibumbye.
Ambasaderi w’u Buyapani mu Rwanda, Isao Fukushima ashima uruhare u Rwanda rukomeje kugira mu kubungabunga umutekano no kugarura amahoro mu bihugu bitandukanye byo kuri uyu mugabane birimo intambara.
Aba bayobozi beretswe ibice bigize iki kigo bagaragarizwa n’imbogamizi gifite zirimo n’inyubako zidahagije.
U Rwanda n’u Buyapani bisanganwe ubufatanye mu bikorwa bitandukanye bikorerwa mu kigo Rwanda Peace Academy bigamije kongerera ubumenyi n’ubushobozi abanyura muri iki kigo.