Kuri uyu wa Gatanu, Umujyanama wa Perezida wa Repubulika mu by’umutekano, General James Kabarebe, yasuye inzego z’umutekano z’u Rwanda ziri mu Ntara ya Cabo Delgado muri Mozambique.
General Kabarebe yakiriwe n’Umuyobozi w’inzego z’umutekano z’u Rwanda zikorera muri iyi ntara, Major General Eugene Nkubito wamweretse ishusho y’aho ibikorwa byo kurwanya iterabwoba bigeze.
Mu biganiro yagiranye n’inzego z’umutekano, General Kabarebe yazishimiye umuhate wazo mu kuzuza inshingano ndetse abasaba gukomereza aho.
Muri Nyakanga 2021 ni bwo u Rwanda rwatangiye kohereza Ingabo na polisi kurwanya ibyihebe mu ntara ya Cabo Delgado.
Kuva icyo gihe inzego z’umutekano z’u Rwanda zifatanyije n’iza Mozambique zarwanyije ibyihebe byari byarigaruriye Intara ya Cabo Delgado, aho kugeza ubu amahoro yagarutse, ndetse n’abaturage bakaba barasubiye mu byabo.
Perezida wa Repubulika, Paul Kagame aherutse gutangaza ko gukemura ibibazo by’umutekano muri iyi ntara bigeze kuri 80%, aho 20% bisigaye na byo bizakemuka.
