Minisitiri w’Ubutegetsi bw’Igihugu, Habimana Dominique, yagiranye inama n’abakozi ndetse n’abayobozi b’agateganyo b’Akarere ka Kayonza, barimo Hategekimana Fred, Umuyobozi w’Akarere w’agateganyo, na Higiro Jules, Umuyobozi w’Akarere wungirije w’agateganyo.
Iyi nama yabereye mu cyumba cy’inama cy’Akarere, igamije kurebera hamwe imikorere y’inzego z’akarere no kunoza imikoranire hagati y’abakozi n’abayobozi mu rwego rwo kurushaho gutanga serivisi inoze ku baturage.
Minisitiri Habimana yashimangiye ko imitangire myiza ya serivisi ari yo nkingi y’iterambere ry’abaturage ndetse n’iry’Akarere muri rusange. Yasabye ubuyobozi n’abakozi gushyira imbere indangagaciro zo kubaha abaturage, kubegera no kumva ibibazo byabo, no gukurikirana neza guhurizwa hamwe no gushyirwa mu bikorwa k’imishinga y’iterambere.
Yagize ati:
“Umuturage ni we dukorera. Gushyira imbere inyungu ze no kumuha serivisi nziza ni uguha agaciro inshingano twahawe. Nimusigasire imikoranire myiza, muzuzanye mu nshingano, kandi mukomeze gukurikirana neza gahunda zose zigamije iterambere ry’abaturage.”
Minisitiri yijeje ubufatanye bw’inzego zitandukanye za Leta mu gufasha Akarere kugera ku ntego zako, anagaragaza ko imikoranire myiza, gukorana umurava no gukemura ibibazo hakiri kare bizafasha Kayonza kurushaho gutera imbere mu buryo burambye.
Ubuyobozi bw’Akarere bwashimiye Minisitiri ku nama n’impanuro z’ingenzi yatanze, buvuga ko bugiye gukomeza gushyira imbaraga mu kunoza imikorere n’imikoranire hagati y’abakozi, abanyamuryango b’inzego z’ibanze n’abaturage.
