Abaturage bo mu Murenge wa Murundi, mu Kagari ka Buhabwa batangaza ko umushinga KIIWP wabagejejeho amazi ku buryo ubungubu abantu batakivoma amazi mabi mu binamba aho mbere bajyaga bayahuriraho n’amatungo.
Umwe mu batuye mu Kagari ka Buhabwa, yatangarije Imvaho Nshya ko kuva Leta y’u Rwanda yabagezaho umushinga KIIWP baciye ukubiri no kubura amazi, ku buryo ubu icyo kibazo bavuga ko cyavugutiwe umuti.
Joseph Sali utuye mu Mudugudu wa Gakoma, Akagari ka Buhabwa, mu Murenge wa Murundi, mu Karere ka Kayonza yavuze ko mbere y’uko bahabwa amazi meza bari babayeho nabi, ariko ko kuri ubu bayabonye bameze neza.
Ati: “Mbere twari dufite ubuzima bubi dufite ikibazo cy’amazi, byabaga ari igihe cy’imvura twavomaga mu mikoki aho amazi yagiye areka, ni yo twakoreshaga, twashoraga inka mu gishanga byabaga ari igihe cy’izuba, uwashoraga inka ni we wazamukanaga amazi, ayazanye mu rugo ari litiro eshanu kuko ntawazamukanaga litiro 10 cyangwa 20.
Twashimye Leta yadufashije idushyiriraho idamu amazi twafataga atemba ku musozi ni yo yajyaga muri iyo damu. [….] Leta itwitaho ituzanira aya mazi meza cyane, batuzanira nayikondo, ubu tuvoma amazi meza”.
Mukarugwiza Denise utuye mu Mudugudu wa Gakoma wari uje kuvoma yavuze ko mbere yo kubona amazi meza yavomaga mu idamu, aho amazi yari mabi yari ibiziba kandi n’inka zihashoka. Iyo inka zabaga zabatanze ku iriba amazi yabaga asa nabi.
Tuyambaze Emmy wari uje kuvoma kuri Nayikondo yatangarije Imvaho ko mbere bavomaga amazi mabi ndetse hakaba nubwo yakamaga.
Ati: “Mbere twavomaga mu bishanga, hakaba nubwo izuba ryavaga agakama burundu tukayabura, ariko aho batuzaniye aya mazi ni meza nta kibazo cy’amazi tugifite”.
Mahoro Elias utuye na we yavuze ko mbere kubona amazi byari bigoye Ati: “Mbere amazi twayasangiraga n’inka, zarashokaga zikandagira mu gishanga natwe tugakandagiramo tukavoma. […] Ubu amadamu ntagikama, ahorana amazi.
Twavomaga amazi mabi ku idamu, ariko aho KIIWP itugejejeho amazi. Mu kwa 7 amazi yarakamaga twajyaga kuyashakira kure bikadutwara amasaha 2,5 cyangwa 3 akaba agejeje hano amazi, ntabwo tukirwanira amazi n’inka, zifite amazi yazo natwe tukavoma kuri nayikondo”.
Umuyobozi wa Komite icunga amazi, Shyaka Sammuel yasobanuye ko mbere ya KIIWP bari bafite ikibazo cy’amazi yo gukoresha ndetse no kuhira inka.
Ati: “Twanywaga amazi amanuka mu misozi, tugakaraba amazi amanuka mu misozi, nta wambaraga imyenda y’igitare kubera yuko atabonaga amazi yo kuyimeshesha. Ayo mazi yahageraga yarakamaga izuba rivuye mu kwa munani […] KIIWP imaze kuhagera iduha amazi, kuri ubu kuba hari nayikondo inka ziruhirwa neza n’abantu bakavoma amazi meza.
Yongeyeho ko amazi avomwa n’ingo zigera kuri 83 naho inka zihashoka ziri hagati ya 800-1000 ku munsi.
Umuyobozi w’agateganyo w’umushinga KIIWP, Usabyimbabazi Madeleine yagaragaje uburyo bafashije abaturage gukemura ikibazo cy’amazi yari ingume.
Ati: “Hakozwe amariba yitwa nayikondo akoresha imirasire y’izuba agera kuri 20, ubu imirimo y’icyiciro cya 1 cy’umushinga tugeze nko kuri 98%. Amadamu twakoze yabashije guhunika amazi ahagije”.
Umuyobozi w’Akarere ka Kayonza Nyemazi John Bosco yavuze ko ako karere kakunze kwibasirwa n’amapfa, ariko ko umushinga KIIWP wabaye igisubizo.
Ati: “Ni akarere kakunze kwibasirwa n’amapfa ariko hari gahunda nyinshi Leta yagiye ishyiraho muri ibyo bice [….] abaturage barahinga bakeza. Nubwo hakiri izo ngaruka ziterwa n’imihindagurikire y’ibihe.
KIIWP uhereye mu Mirenge ya Kabarondo na Murama mu cyanya cyahinzwemo imbuto kuri Hegitari 1150, hashyizweho imashini zizamura amazi yuhira izo mbuto, ndetse n’abaturage babonyemo akazi.
Hari ibidamu bigera kuri 15 hakaboneka amazi yo kuhira inka, ariko ubu tugeze ku bidamu 26 biturutse ku mushinga KIIWP, hari ubwogero mu mirenge y’ubworozi, kano zo kuvomaho n’ibindi”.
Yavuze ko ari umushinga mwiza ugeze mu cyiciro cya 2, munini ufite impinduka nziza ku buzima bw’abaturage.
