Perezida wa Repubulika y’u Rwanda Paul Kagame, yakomoje ku gisobanuro cyo kuba ikirangirire cyangwa umunyembaraga, ashimangira ko kugera ku rwego rwo kuba umuntu wandika ayo mateka bijyana n’amahitamo.
Yabikomojeho ku Cyumweru tariki 13 Kanama 2023, mu mpanuro yagejeje ku bihumbi by’abitabiriye imuhango wo gutangiza Iserukiramuco ryiswe Ibihangange by’Afurika (Giants of Africa), ryateguwe n’Umuryango Giants of Africa ufasha urubyiruko rw’Afurika kuzamura impano mu mukino wa Basketball. 
Ni iserukiramuco ryahuriranye no kwizihiza Isabukuru y’imyaka 20 Umuryango Giants Of Africa umaze ushinzwe n’abarimo Masai Ujiri, Perezida w’Ikipe ya Toronto Raptors yo muri Canada, ikina muri Shampiyona ya Basketball muri Leta Zunze Ubumwe z’Amerika (NBA).
Perezida Kagame, mu butumwa bwe, yagize ati: “Muzi ko mu gitekerezo cyagutse cyo kuba ikirangirire hazamo amahitamo. Ugomba gufata icyemezo. Ibyo ukwiye kubikora uzirikana ko muri Afurika, Aziya, Amerika, i Burayi no muri Amerika y’Amajyepfo, aho ari ho hose buri wese ashobora kandi akwiye kuba ikirangirire.
Ntidukwiye guhitamo inzira zoroshye. Dukwiye guhutamo inzira twigaragarizamo tugakora cyane, tukiteza imbere, kandi tugatezanya imbere duharanira gukoresha ubushobozi bwacu bwose.”
Perezida Kagame yasabye urubyiruko gutangira gukora ibikomeye, gutanga umusanzu warwo mu guteza imbere umugabane w’Afurika, no kudahora rwibutswa ahubwo rukamenya ko nta wundi waruhitiramo kuba ibirangirire.
Perezida Kagame kandi yasabye uru rubyiruko kuba umwe nk’Abanyafurika kandi ko bagomba kwiyumvamo ubushobozi bwo kugera kubyo bifuza.
Kwizihiza imyaka 20 y’Umuryango Giants of Africa byahuriranye n’Iserukiramuco rizamara iminsi irindwi, aho urubyiruko rurenga 250 ruturutse hirya no hino muri Afurika ruzahabwa imyitozo yo ku rwego rwo hejuru n’inzobere mu mukino wa Basketball hagamijwe kurwongerera ubushobozi muri uyu mukino.
Kuri iki Cyumweru kandi, Umuyobozi Mukuru wa Giants of Africa Masai Ujiri arikumwe na minisitiri wa Siporo Aurore Mimosa Munyagaju bafunguye ku mugaragaro ikibuga cy’ umukino wa Basktball mu karere ka Rwamagana.
Giants Of Africa ni Umuryango umaze imyaka 20 ufasha abana bakiri bato kugaragaza impano zabo mu mukino wa Basketball, kuri ubu ukaba ukorera mu bihugu 16 by’Afurika, ari na byo byahagarariwe mu iserukiramuco ryaranzwe n’ibirori bidasanzwe aho abitabiriye bataramiwe n’Umuhanzi Diamond Platnumz.
Hanagaragajwe imico itandukanye y’abahagarariye ibihugu byabo muri uwo muhango binyuze mu mikino n’imbyino gakondo.
Masai Ujiri uri mu bashinze uyu Muryango, na we yavuze ko urubyiruko rufite ubushobozi bwo kuba ibihangange.