Minisitiri w’Ububanyi n’Amahanga n’Ubutwererane w’u Rwanda, Dr Vincent Biruta, ari i Yaoundé muri Cameroun aho yitabiriye Inama ya 44 y’Abaminisitiri bo mu bihugu bikoresha Igifaransa (Francophonie/ OIF).
Umuhango wo gufungura iyi nama y’iminsi ibiri wayobowe n’Umunyamabanga Mukuru wa OIF, Mushikiwabo Louise, Minisitiri w’Intebe wa Cameroun, Joseph Dion Ngute ndetse na Minisitiri w’Ububanyi n’Amahanga wa Tunizia, Nabil Ammar.
Ni inama yatangiye ku ya 4 ikaza gusozwa kuri uyu wa 5 Ugushyingo 2023, aho igomba kwiga ku ngingo zitandukanye ziteguza Inama y’Abakuru b’Ibihugu bya OIF, iteganyijwe kubera mu Bufaransa mu 2024.
Mu minsi ibiri y’iyi nama, Abaminisitiri n’abandi bayobozi batandukanye bateraniye hamwe mu rwego rwo kugira bimwe mu byemezo bya politiki, gahunda z’uyu muryango, imyanya imwe n’imwe y’ubuyobozi ndetse n’ingengo y’imari mu rwego rwo gutangiza ibikorwa biteganyijwe mu 2024-2027.
Muri iyi nama ya OIF kandi, abayitabiriye batanze ibiganiro ku nsanganyamatsiko igira iti: “Imiyoborere myiza: Ikizere ku mutekano muri politiki, ubukungu n’umuco ku baturage bavuga Igifaransa.”
OIF ni umuryango ubumbira hamwe abaturage barenga muri Miliyoni 321 bo mu bihugu 88 biwubarizwamo. Mu bihugu 88 biwugize harimo 54 bibarwa nk’ibinyamuryango mu buryo bwuzuye na 27 by’indorerezi.
U Rwanda rusanzwe ari umunyamuryango wa OIF kuva mu 1970, ndetse kugeza ubu Umunyarwandakazi, Louise Mushikiwabo, akaba ari we Munyamabanga Mukuru wawo.
