Ubushinjacyaha bwasabye urukiko rw’ibanze rwa Kicukiro kuzafunga Miss Muheto Divine Nshuti umwaka n’amezi umunani kubera ibyaha ashingwa birimo gutwara ikinyabiziga yanyoye, kugonga ibikorwaremezo, gutwara na ruhushya no guhunga.
Ibi ubushinjacyaha bwabisabye mu gitondo cyo kuri uyu wa Kane, tariki 31 Ukwakira 2024, ubwo Miss Nshuti Muheto Divine yitabaga Urukiko rw’Ibanze rwa Kicukiro, ngo aburane ku ifungwa n’ifungurwa ry’agateganyo.
Ubushinjacyaha bwavuze ko uyu mukobwa yanywereye mu kabari kitwa ‘Atelier du vin’ bigeze saa sita z’ijoro afata imodoka ye arataha.
Bwavuze ko kubera ubumenyi buke mu gutwara imodoka no kuba yanyweye ibisindisha ku rwego rwo hejuru yagonze ipoto y’amashanyarazi n’umukindo.
Nyuma yo kugonga ngo yaje guhunga, abaturage baramuhururiza ariko nyuma aza kugaruka aje kujyana telefoni ze nibwo yahasanze polisi ayibwirako atari we wari utwaye icyo kinyabiziga.
Ubushinjacyaha bwabwiye urukiko ko Miss Nshuti Muheto atari ubwa mbere akora ibyo kuko ku wa 23 Nzeri 2024 yari yagiriwe inama ndetse anasaba imbabazi.
Divine Muheto ngo yarapimwe bigaragara ko mu mubiri we harimo alcohol yo ku kigero cya 4.00 kandi umuntu atagomba kurenza 0.8.
Bwasabye ko Urukiko kumuhamya ibyaha bitatu akurikiranyweho bityo agahanishwa gufungwa Umwaka umwe n’amezi umunani ndetse n’ihazabu y’ibihumbi 220,000 Frw.
Miss Muheto wari wunganiwe n’abanyamategeko batatu yemera ibyo ariko agahakana ko atigeze ahunga.
Yagize ati: “Nemera gutwara nasinze, gutwara nta ruhushya no kugonga ariko sinemera guhunga.”
Yavuze ko nyuma yo kugonga yagiye ku ruhande kuko yari abonye abantu benshi bahuruye ariko ko atigeze ahunga.
Ndetse ngo yagumye gutegereza Polisi ngo ize irebe uko byifashe.
Umunyamategeko we yavuze ko uyu mukobwa yemera ibyaha akanabisabira imbabazi yongeraho ko kuva mu ibazwa rye atigeze arushya inzego z’ubutabera.
Yavuze ko yari afite uruhushya rw’agateganyo rwo gutwara ibinyabiziga bityo ko amategeko y’umuhanda yari ayazi, ariko ko yakoze ikosa ryo gutwara adafite uruhushya rwa burundu.
Yagaragarije urukiko ko ipoto Miss Muheto yagonze igihagaze ndetse n’umukindo ugihari bityo ko atigeze ahunga.
Umwanzuro w’urukiko uzasomwa ku wa Gatatu, tariki ya 6 Ugushyingo 2024, saa Cyenda z’amanywa