Abanyakenya bihariye imyanya ya mbere mu Isiganwa Mpuzamahanga ryo ku maguru “Kigali International Peace Marathon 2024” ryabaye kuri uyu wa 9 Kamena 2024, haba muri Full Marathon na Half-Marathon mu bagabo no mu bagore.
Kuri iki Cyumweru ni bwo Marathon Mpuzamahanga ya Kigali yitiriwe amahoro, yabaye ku nshuro yayo ya 19 mu byiciro bitatu biyigize birimo Full Marathon y’ibilometero 42.195; Half-Marathon y’ibilometero 21.098 na Run for Peace cyangwa Run for Fun yitabirwa n’abasiganwa bisanzwe ku ntera y’ibilometero 10.
Abantu bagera ku 10,183 bo mu bihugu 35 byo ku migabane yose y’Isi ni bo biyandikishije mu isiganwa ry’uyu mwaka barimo abavuye hanze y’u Rwanda 4,001.
Minisitiri wa Siporo, Munyangaju Aurore Mimosa, Umuyobozi w’Umujyi wa Kigali, Dusengiyumva Samuel n’abandi bayobozi ni bo batangije ku mugaragaro iri siganwa ryitabiriwe bwa mbere n’abantu basaga ibihumbi 10 kuva yatangira kuba mu 2005.
Minisitiri wa Siporo, Munyangaju Aurore Mimosa n’Umuyobozi w’Umujyi wa Kigali, Dusengiyumva Samuel bari mu bakoze intera y’ibilometero 10 muri “Run for Peace” yatangiye gukinwa saa mbiri n’iminota 40.
Muri Full Marathon yareshyaga n’ibilometero 42.195 yatangiye gukinwa saa mbiri, Abanyakenya bihariye imyanya itatu ya mbere.
Uwa mbere yabaye Laban Korir wakoresheje amasaha 2 iminota 16 n’amasegonda 6, akurikirwa na mwenewabo Cornelius Kipeti Kiplagat wakoresheje amasaha 2 iminota 16 n’amasegonda 18, mu gihe uwa gatatu yabaye Mengich Moses wakoresheje amasaha 2 n’iminota 18 n’amasegonda 38.
Mu bagore Umunyakenya Joan Kipyatich, ni we wabaye uwa mbere akoresheje amasaha 2, iminota 33 n’amasegonda 27 akurikirwa n’Umunya- Ethiopia Meseret, Abebave wakoresheje amasaha abiri iminota 36 n’amasegonda umunanni, umwanya wa gatatu wegukanywe n’Umunyakenya Florence, Chepsoi Jepkosgei, wakoresheje amasaha abiri iminota 39 n’amasegonda 34.
Muri Half-Marathon yareshyaga n’ibilometero 21.0975, mu bagabo imyanya ya mbere yihariwe n’Abanyakenya, aho uwa mbere yabaye Francis Kipkorir langat wakoresheje isaha imwe iminota ine n’amasegonda 5 akurikirwa Langat, Leonard Kipkoech wakoresheje isaha imwe isaha imwe iminota ine n’amasegonda 24.
Umunyarwanda Mutabazi Emmanuel yegukanye umwanya wa gatatu akoresheje isaha imwe, iminota ine n’amasegonda 27.
Mu bagore, Umunyakenya Winfridah Moraa Moseti ni we wabaye uwa mbere akoresheje isaha imwe, iminota 12 n’amaseogonda 50, akurikirwa na mugenzi we Cheruiyot, Vivian Jepkogei wakoresheje isaha imwe iminota 14 n’isegonda rimwe.
Umunyarwandakazi Imanizabayo Emeline yegukanye umwanya wa gatatu akoresheje isaha imwe, iminota 14 n’amasegonda 2.
Kigali International Peace Marathon yitabiriwe n’abakinnyi bakomeye nyuma y’uko ibihembo byayo bizamuwe kuko kuri ubu ari iya gatatu ihemba amafaranga menshi muri Afurika.
Umukinnyi wegukanye Marathon mu bagabo n’abagore yatsindiye ibihumbi 20$ [asaga miliyoni 22 Frw], uwa kabiri yahawe ibihumbi 15$ naho uwa gatatu atwara 7500$.
Mu basiganywe igice cya Marathon [ibilometero 21,098], uwa mbere mu bagabo no mu bagore arahabwa amadolari y’Amerika 5000 [asaga miliyoni 5,5 Frw], uwa kabiri abone amadolari 4000, mu gihe uwa gatatu ahabwa amadolari 3000.
Muri ibi byiciro byombi, hahembwa kuva ku mukinnyi wa mbere kugeza ku wa munani, aho muri Marathon uwa nyuma abona amafolari 1000 naho muri Half-Marathon akabona amadolari 400.
Buri wese witabiriye isiganwa ry’uyu mwaka, yahawe umudali ugaragaza ko yarikinnye.
