Abinyujije ku rubuga rwe rwa X, Perezida wa Repubulika Paul Kagame yavuze ko yagiranye ibiganiro na mugenzi we wa Angola, João Lourenço, byabaye mu ijoro ryakeye rya tariki 30 rishyira 31 Mutarama 2025.
Perezida Kagame na João Lourenço, usanzwe ari umuhuza mu kibazo cy’umutekano muke umaze igihe mu Burasirazuba bwa Repubulika Iharanira Demokarasi ya Congo (RDC), baganiriye kuri icyo kibazo ndetse n’umuti urambye watuma gikemuka burundu.
Abakuru b’ibihugu byombi baniyemeje gukorana n’abandi ku mugabane wa Afurika mu gushaka ibisubizo, binyuze mu gusigasira imikoranire isanzwe.
Ibi biganiro bibaye nyuma gato y’aho ihuriro AFC/M23 rifashe umujyi wa Goma muri RDC nyuma y’imirwano ikomeye, bamwe mu bakuru b’ibihugu bakavuga ko u Rwanda rufasha abo barwanya ubutegetsi bwa RDC, mu gihe rwo ruhora ruhakana ibyo birego.
Ibi biganiro bibaye nyuma gato y’aho ihuriro AFC/M23 rifashe umujyi wa Goma muri RDC nyuma y’imirwano ikomeye, bamwe mu bakuru b’ibihugu bakavuga ko u Rwanda rufasha abo barwanya ubutegetsi bwa RDC, mu gihe rwo ruhora ruhakana ibyo birego.
Mu nama y’Abakuru b’ibihugu by’Umuryango wa Afurika y’Iburasirazuba (EAC) yiga ku bibazo byo mu burasirazuba bwa RDC, yabaye ejobundi, Perezida Kagame yagaragaje ko bamwe muri abo bakuru b’ibihugu bicecekeye kuri icyo kibazo bitewe n’inyungu zabo, batitaye ku ngaruka babonaga ko bizagira.
Perezida Kagame yanagarutse kuri bimwe mu bihugu bya EAC byohereje ingabo zabyo kurwana ku ruhande rwa RDC, zikanafatanya na FDLR igizwe n’abasize bakoze Jenoside yakorewe Abatutsi mu Rwanda, abacanshuro n’abandi, akavuga ko ibyo bitari gukemura ikibazo nk’uko babyibwiraga, ari byo barimo kubona ubu