Perezida wa Kenya, Dr William Ruto, yongeye gutangaza abandi ba Minisitiri icumi bagize Guverinoma ye barimo bane bari mu ruhande rw’abatavuga rumwe na we.
Ku wa Gatanu w’icyumweru gishize Perezida Ruto yari yatangaje abandi ba Minisitiri ariko avuga ko azongeramo abandi abanje kugisha inama abanyapolitike batandukanye.
Abaminisitiri bane muri aba basanzwe mu ihuriro Azimio la Umoja ry’imitwe ya politiki itavuga rumwe n’ubutegetsi, barimo John Mbadi wagizwe Minisitiri ushinzwe ikigega cy’Igihugu, Opiyo Wandayi wagizwe Minisitiri w’Ingufu na Peteroli, Ali Hassan Joho wagizwe Minisitiri w’Ubucukuzi bw’Amabuye y’Agaciro na Wycliffe Oparanya wagizwe Minisitiri w’Amashyirahamwe.
Abandi ba Minisitiri baturuka mu ihuriro Kenya Kwanza riri ku butegetsi barimo Salim Mvurya wagizwe Minisitiri w’Ishoramari, Ubucuruzi n’Inganda, Rebecca Miano wagizwe Minisitiri w’Ubukerarugendo na Kipchumba Murkomen wagizwe Minisitiri ushinzwe urubyiruko na siporo.
Alfred Mutua yagizwe Minisitiri w’Umurimo n’Ubwishingizi bw’Abakozi, Justin Muturi yagizwe Minisitiri ushinzwe Serivisi za Leta na Stella Soi Lang’at wagizwe Minisitiri ushinzwe uburinganire, umuco, ubugeni n’umurage.
Perezida Ruto yavuze ko akirambagiza abandi bo gushyira muri iyi Guverinoma kandi ko azabatangaza vuba mu gihe kitarambiranye.
Mu ijambo rye nyuma yo gutangaza abagize Guverinoma, Perezida Ruto yasabye ko abatawe muri yombi mu myigaragambyo barekurwa bose kandi ibyaha bari bakurikiranyweho bikavanwaho.
Perezida Ruto yagaragaje ko gufata icyemezo cyo kubarekura bigamije kurengera ubukungu bw’Igihugu kubera ko amafaranga yari kuzakoreshwa mu iperereza kuri ibyo byaha bashinjwa azakoreshwa mu bindi.
Umukuru w’Igihugu cya Kenya yamaganye ingufu z’umurengera zakoreshejwe n’abashinzwe umutekano mu gutatanya abigaragambyaga asaba ko hakorwa iperereza ryihuse ku mpfu z’abantu bose baguye muri iyo myigaragambyo.
Komisiyo y’Uburenganzira bwa Muntu muri Kenya yavuze ko iyi myigaragambyo imaze kugwamo abantu 50 abandi 68 batawe muri yombi mu gihe abasaga 60 bivugwa ko bashimuswe.
Tariki ya 19 Nyakanga, nibwo Perezida Ruto yatangaje urutonde rw’icyiciro cya mbere cy’abaminisitiri bajya muri Guverinoma nshya, harimo n’abahoze mu yari icyuye igihe nka Aden Duale wasubijwe ku mwanya wa Minisitiri w’Ingabo na Prof Kithure Kindiki wasubijwe ku mwanya wa Minisitiri w’Umutekano w’Imbere.
Tariki ya 11 Nyakanga 2024, Perezida Ruto yafashe umwanzuro wo gusesa Guverinoma, nyuma y’imyigaragambyo ikomeye yamusabaga guhagarika itegeko rigenga ingengo y’imari ryari ririmo ingingo yongera umusoro no gufata ingamba zoroshya imibereho y’abaturage.
Usibye gusesa iyi Guverinoma, Perezida Ruto yari aherutse gufata icyemezo cyo kugabanya amafaranga yateganyirijwe inzego za Leta, aca ingendo zitari ngombwa z’abayobozi bajya mu mahanga, akuraho n’ingengo y’imari iteganyirizwa umugore w’Umukuru w’Igihugu, uwa Minisitiri w’Intebe n’uwa Visi Perezida.
Guverinoma nshya ya Kenya iyoborwa na Minisitiri w’Intebe akaba na Minisitiri w’Ububanyi n’Amahanga, Musalia Mudavadi. Igiyeho nyuma y’ibiganiro byahuje Perezida Ruto n’abavuga rikumvikana barimo abo mu mitwe ya politiki itavuga rumwe na we.