Ihuriro rya Sosiyete Sivile zo muri Teritwari zigize Intara ya Kivu ya Ruguru riranenga ingabo za Repubulika Iharanira Demokarasi ya Congo (FARDC) zasubiye inyuma zikarekera umutwe wa 23 ibice bimwe na bimwe itarinze irwana.
Amakuru atangazwa na BBC agaragaza ko kuva mu ntangiriro z’iki cyumweru, M23 yafashe utundi duce two mu Majyaruguru ya Teritwari ya Rutshuru, turimo agace ka Vitshumbi kari ku nkengero z’ikiyaga Rwicanzige (Lac Édouard), hamwe n’agace ka Rwindi.
Utu duce n’utundi byegeranye bivugwa ko twafashwe na M23 nta mirwano ibaye, nyuma y’uko ingabo za Leta n’imitwe ya Wazalendo bafatanya, bahunze utu duce bagenzuraga kugeza mu cyumweru gishize.
Ingabo za Leta nta cyo ziratangaza ku duce tundi duheruka gufatwa n’inyeshyamba za M23.
Bamwe mu bakurikira iyi ntambara bavuga ko ubu M23 igenzura hafi 90% bya Teritwari ya Rutshuru ndetse ko yaba isatira Teritwari za Lubero mu Majyaruguru, na Walikale mu burengerazuba.
Ihuriro rya Sosiyete Sivile zo muri teritwari zigize Intara ya Kivu ya Ruguru ku wa Kabiri, ryasohoye itangazo ryinubira gusubira inyuma kw’ingabo za Leta.
Iryo huriro rigira riti: “Kandi iyo agace gafashwe na M23 biragoye ko hakorwa umuhate wo kugasubirana kandi ibyo ni ukuva mu 2022 ku ifatwa rya Canzu na Runyoni.”
Gufatwa kw’agace ka Rwindi nta mirwano ibaye kwasize ibibazo, mu gihe aha hasanzwe hari ikigo cya gisirikare gikomeye cy’ingabo za Leta ya Congo ubu cyigaruriwe na M23, nk’uko iri huriro ryitwa Forces Vives ribivuga.
Radio Mpuzamahanga y’Abafaransa (RFI) yatangaje ubutumwa bwa Jean Claude Bambanze, uyobora Sosiyete Sivile ya Rutshuru, wagize ati: “FARDC yavuye muri ako gace (Rwindi) mbere y’uko inyeshyamba zihagera, zitarwanye. Ese hari ibyitso? Abagambanyi imbere mu ngabo?”
Itangazo ry’ihuriro rya Sosiyete Sivile zo muri Kivu ya Ruguru ryo rivuga ko “iyo migirire y’ingabo za Leta ituma hari abakeka ko hari ubugambanyi mu gisirikare no mu nzego za Leta.”
Rivuga kandi ko “ikibabaje cyane, bisa n’aho Guverinoma ishyigikiye iyo migirire ya FARDC kuko nubwo ikomeza kongera ibikoresho bya gisirikare n’abasirikare, nta gihinduka ku rubuga rw’imirwano kandi umutekano urushaho kumera nabi umunsi ku wundi.”
Ubuyobozi bw’Igisirikare cya Leta nta cyo baratangaza ku bivugwa n’iri huriro rya Sosiyete Sivile zo muri Kivu ya Ruguru.
Umutwe wa M23 aho ufashe ubwira abaturage usanze ko uje kubabohora ubutegetsi bubi bwa Leta ya Kinshasa, kuva wakwihuza n’ishyaka rya Corneille Nangaa wahoze akuriye Komisiyo y’Amatora ya RDC bagashinga ihuriro Alliance Fleuve Congo.