Abageze mu zabukuru barokotse Jenoside yakorewe Abatutsi bo mu mirenge ya Mudende na Bugeshi mu Karere ka Rubavu, barishimira ko kwibohora ku nshuro ya 29 bisanze bubakiwe inzu nziza bakaba bagiye gutura neza.
Ni inzu zubakishije amatafari ahiye.
Bene zo bashima ko zitandukanye n’izo bari bubakiwe mbere Jenoside igihagarikwa kuko izi zo zikomeye, zirisanzuye yewe ngo zifite no mu gikari.
Aba babyeyi bageze mu zabukuru bashima ubuyobozi bwakomeje kubitaho muri iyi myaka 29 ishize u Rwanda rwibohoye.
Bahamya ko imiyoborere myiza u Rwanda rwimakaje yababereye ihumure no kubaho neza.
Ubuyobozi bw’akarere buvuga ko inzu 32 nk’izi arizo zubatswe mu mirenge itandukanye y’akarere ka Rubavu.
Bene inzu, biteganyijwe ko bazinjiramo muri iyi Nyakanga, hamaze kuboneka ibikoresho byo mu nzu.