Hari abarokotse Jenoside yakorewe Abatutsi batishoboye mu Karere ka Rusizi bageze mu zabukuru, basaba guhabwa inkunga y’ingoboka ikabafasha mu mibereho yabo ya buri munsi kuko ngo nta mbaraga zo gukora bagifite.
Nyiraribakare Verena w’imyaka 72 y’amavuko, yahabwaga inkunga y’ingoboka iza guhagarara ubu imyaka itatu irashize.
Liberatha Nyirandibwami w’imyaka 88 y’amavuko we ntarayihabwa na rimwe, bombi batuye mu Murenge wa Rwimbogo barashaje nta n’imbaraga bagifite zo kugira icyo bakora.
Mu mibereho yabo hari ibyo bakenera ntibabibone, iyi nkunga bayihawe ngo yabafasha muri byinshi.
Umuyobozi w’Akarere ka Rusizi wungirije ushinzwe imibereho myiza y’abaturage, Dukuzumuremyi Anne Marie avuga ko MINUBUMWE itarabaha uburenganzira bwo kwemeza abandi bayihabwa kandi umubare w’abageze mu zabukuru bakeneye iyi nkunga ngo umaze kuba munini.
Ubuyobozi bw’Akarere ka Rusizi butangaza ko kuri ubu bafite abarokotse Jenoside bakabakaba 1900 bahabwa inkunga y’ingoboka.
Gusa umubare w’abakeneye iyi nkunga ntuzwi kuko ngo batarabarurwa.