Abaturage bo mu Karere ka Rutsiro mu Murenge wa Murunda, babwiye Umuvunyi Mukuru, Nirere Madeleine, ko bagifite ibibazo biterwa na ruswa n’akarengane, bamusaba ko byakwitabwaho kuko bibangamira ituze n’iterambere ryabo.
Bimwe mu bibazo bibangamiye ituze ry’abaturage bo muri Murunda birimo ruswa basabwa n’abayobozi bo mu nzego z’ibanze, bigatuma barengana.
Ibi bibazo babigejeje ku Muvunyi Mukuru, wari wabasuye mu gihe uru rwego ruri mu Cyumweru cyo gukumira no kurwanya akarengane.
Ibindi bibazo biri muri aka gace birimo ingo zibana zitarasezeranye, bigatera amakimbirane yo mu muryango n’ibindi.
Muri rusange, abaturage bagejeje ku Muvunyi, ibibazo bigera kuri 56.
Nirere yasanze byinshi biterwa n’ubuyobozi mu nzego z’ibanze butegera abaturage uko bikwiye.
Umuvunyi Mukuru, Nirere Madeleine, yavuze ko ukwezi baba bihaye bumva abaturage, kuba kugamije gukemura ibibazo by’akarengane na ruswa bitaragera mu bugenzacyaha n’inkiko.
Urwego rw’Umuvunyi rwatangaje ko ruzakomeza kwakira ibibazo by’abaturage mu Karere ka Rutsiro birimo ibya ruswa n’akarengane kugeza ku munsi wo ku wa Kane.
Umunsi wa mbere wa gahunda yo gukumira no kurwanya akarengane waranzwe no kwigisha abaturage ububi bw’akarengane na ruswa n’inzira zo kubitangaho amakuru hamwe no kwakira ibibazo by’abaturage.
Ku wa Mbere, iyi gahunda yitabiriwe n’abaturage barenga 800 mu Mirenge ya Murunda, Gihango na Mukura ahakiriwe ibibazo byiganjemo ibishingiye ku butaka n’imibereho 52 ndetse muri byo 18 bihita bikemuka, ibindi bihabwa igihe ntarengwa bizakemurirwaho.
Nyuma yo kwakira ibyo bibazo, Urwego rw’Umuvunyi ruzicarana n’abayobozi b’Akarere ka Rutsiro, bubagaragarize ibyakemuwe, ibyo bakwiye kwitaho bigakemurwa, byananirana bigashyikirizwa inzego zisumbuye.
Freddy Ruterana