Muri Tanzania mu gihe hizihizwa umunsi w’Ubwigenge, abaturage banze kubahiriza ibyasabwe na Leta.
Muri Tanzania abaturage bazindukiye mu mihanda bari kwigaragambiriza ubutegetsi bwa Perezida Samia Suluhu Hassan watsinze amatora kuri 98%.
Ku wa 09 Ukuboza 2025 mu mihanda ya Dar es Salaam abaturage benshi bigabije imihanda barenga kuri gasopo bahawe n’ubuyobozi bw’igihugu.
Ubuyobozi bwari bwasabye abaturage kuguma mu nzu bakaba ariho bizihiriza umunsi w’Ubwigenge,iki gihugu cyakuye ku Bwongereza.
Tanganyika na Zanzibar byiyunze ku wa 24 Mata 1964 bihinduka Repubulika yunze ubumwe ya Tanzania. Tanganyika yabonye ubwigenge ku Bwongereza mu Ukuboza 1961 naho Zanzibar yabonye Ubwigenge ku ya 12 Mutarama 1964.
Ku ya 9 Ukuboza 1961 Minisitiri w’Intebe mushya wa Tanganyika Julius Kambarage Nyerere yagejeje ijambo ku benegihu abamenyesha ko babonye ubwigenge babukuye ku Bongereza.
Ubwongereza bwakoronije Tanganyika imyaka 45 kuva mu 1916 kugeza mu 1961. Ubwongereza bwafashe Tanganyika nyuma y’intambara y’isi ya mbere yasize Ubudage bucitse intege ku ruhando mpuzamahanga bwamburwa ibihugu byose bwari bwarahawe mu nama yabereye I Berlin iyobowe na Otto Von Bismark. Ubudage bwari bwarahawe Tanganyika mu 1884.
Kuva Tanzaniya yabona ubwigenge, imaze kuyoborwa n’abaperezida batandatu. Julius Kambarage Nyerere yahereye mu 1962 kugeza mu 1985. Itegeko nshinga ryabo ryagiyeho mu 1964 riha umuperezida manda y’imyaka itanu.
Icyakora Nyerere yayoboye manda enye. Nyerere yakurikiwe na Ali Hassan Mwinyi (1985-1995), Benjamin Mkapa (1995-2005), Jakaya Kikwete (2005-2015), John Magufuli (2015-2021), Samia Suluhu Hassan (2021 kugeza ubu).
