Minisitiri w’Ubumwe bw’Abanyarwanda n’Inshingano Mboneragihugu Dr. Jean Damascène Bizimana, ubwo yagezaga ijambo ku bitabiriye umuhango wo kwibuka ku nshuro ya 80 inzirakarengane zazize Jenoside yakorewe Abayahudi, yashimangiye ko kwibuka ari inshingano rusange zihuriweho n’ibihugu, Guverinoma, imiryango mpuzamahanga, sosiyete sivile ndetse n’abantu ku giti cyabo.
Yagaragaje uburyo Jenoside yakorewe Abayahudi, yatumye umuryango mpuzamahanga ushyiraho ndetse ugaharanira guteza imbere amategeko agamije gukumira no gukurikirana abayigizemo uruhare.
Minisitiri Bizimana ariko yongeye kugaragaza ko hagiye haba intege nke, mu gushyira mu bikorwa amasezerano mpuzamahanga yo gukurikirana abakekwaho uruhare muri Jenoside, atanga urugero rwa Félicien Kabuga uri mu bagize uruhare rukomeye muri Jenoside yakorewe Abatutsi mu 1994.
Yavuze ko hakiri impungenge cyane ku kuba hari ahakigaragara ingengabitekerezo ya Jenoside, cyane cyane ikomeje gukwirakwizwa n’imitwe irwanya Abayahudi n’Abatutsi, harimo nka FDLR, binyuze mu bikorwa byayo muri Repubulika Iharanira Demokarasi ya Kongo (DRC) birimo no guteza umutekano muke, byatumye abantu ibihumbi amagana bava mu byabo.
Minisitiri Bizimana kandi yashimangiye n’akamaro k’ubufatanye hagati y’ibihugu n’imiryango mpuzamahanga, mu kurwanya imvugo z’inzangano no kwigisha abakiri bato ibijyanye no kubabarira, kubana ndetse no kubahana.
Yashimiye Guverinoma y’u Budage na Leta ya Israel kuba yarateguye iki gikorwa cyo kwibuka, kandi ashimangira ko Guverinoma y’u Rwanda yiyemeje kubungabunga amateka ya Jenoside yakorewe Abayahudi hamwe n’inzibutso za Jenoside yakorewe Abatutsi.
Minisitiri Dr. Bizimana yashimangiye kandi ko u Rwanda rwiyemeje gushyira aya mateka y’ingenzi, mu byo abanyeshuri bagomba kwiga mu mashuri yo mu gihugu kugira ngo azakomeze guhererekanywa uko ibiragano bizagenda bikurikirana.
