U Rwanda rwohereje Abapolisi 140 mu butumwa bw’Umuryango w’Abibumbye bwo kubungabunga amahoro muri Santarafurika (MINUSCA). Berekeje mu Mujyi wa Bangui ku wa Kabiri, tariki ya 10 Kamena 2025.
Aba bapolisi basimbuye bagenzi babo bagize Itsinda RWAPSU1-9, bari bamaze umwaka mu butumwa bwa Loni muri Bangui.
Itsinda RWAPSU1-10 ryerekeje mu Mujyi wa Bangui riyobowe na SSP James Karasi, ryahagurutse i Kigali mu gitondo cyo ku wa Kabiri ryerekeza mu Murwa Mukuru Bangui.
CP Yahya Kamunuga uyobora Ishami rya Polisi rishinzwe Ibikorwa by’Ubutumwa bwo kubungabunga Amahoro (PSO) wabaherekeje ku Kibuga cy’Indege Mpuzamahanga cya Kigali, yabashimiye ubwitange n’umurava byabaranze mu gihe cyo kwitegura gusimbura bagenzi babo.
Itsinda ry’abapolisi RWAPSU rifite inshingano zo kurinda abayobozi bakuru muri Guverinoma ya Santarafurika n’ab’Umuryango w’Abibumbye barimo Minisitiri w’intebe, Minisitiri w’Ubutabera, Perezida w’Inteko Ishinga Amategeko, Intumwa yihariye y’Umunyamabanga Mukuru w’Umuryango w’Abibumbye (SRSG) n’abamwungirije babiri ndetse n’Umuyobozi w’Ishami rya Polisi mu Muryango w’Abibumbye (UNPOL).
CSP Rutagambwa yagarutse ku bikorwa bitandukanye bigamije guteza imbere imibereho myiza y’abaturage bakoze muri Santarafurika, byiyongera ku kazi ko gucunga umutekano w’abayobozi bari bafite mu nshingano.
Yagize ati “Uretse inshingano nyamukuru twari dufite zo gucungira umutekano abayobozi bakuru b’igihugu n’ab’Umuryango w’Abibumbye, twagiye dukora n’ibikorwa byo gufasha mu mibereho myiza y’abaturage birimo umuganda, gutanga amaraso ku bushake, guha imiti abaturage batishoboye ku buntu no kubagezaho amazi meza yo kwifashisha mu bikorwa by’isuku.”
Uretse Itsinda RWAPSU rikorera mu Murwa Mukuru wa Bangui, hari andi matsinda atatu y’Abapolisi b’u Rwanda muri Santarafurika bakorera mu bice bitandukanye by’igihugu ari yo; RWAFPU-1 na ryo rikorera i Bangui, Itsinda RWAFPU-2 rikorera ahitwa Kaga Bandoro mu bilometero bisaga 300 uvuye Bangui na RWAFPU-3 rikorera Bangassou mu bilometero 725 uvuye mu Murwa Mukuru.
