Umujyanama wa Perezida wa Repubulika mu by’umutekano, Gen James Kabarebe yabwiye urubyiruko rwiga muri Ines Ruhengeri kwirinda kujya ruhindagurika kuko biri mu bituma umuntu ntacyo ageraho, atanga urugero kuri Perezida Kagame utajya uhindura imvugo uhereye mu gihe bari batangiye urugamba rwo kubohora igihugu kugeza uyu munsi.
Yababwiye ko Perezida Paul Kagame kuri we ikintu kibi agifata ko ari kibi n’ikiza agifata ko ari kiza.
Ni ikiganiro kibanze ku mateka y’urugamba rwo kubohora igihugu n’ubutwari bwaranze urubyiruko rwarwanye uru urugamba. Abanyeshuri biganjemo urubyiruko basaga 2000 Gen James Kabarebe yabasabye kugira intego no kubaha mu byo bakora byose kuko biri mu byo bifashishije kugirango batsinde urugamba.
Rumwe mu rubyiruko rwakurikiye iki kiganiro rwavuze ko rwanyuzwe n’impanuro rwahawe, ndetse ko bumva basigaranye umukoro wo kuzasigasira ibikorwa by’ubutwari byakozwe n’intwari z’u Rwanda.
Uru rubyiruko kandi rwiga muri Ines ruhengeri rwasabye ko hashyirwaho uburyo bwo kwigisha urubyiruko rwose amasomo y’ibanze ya gisirikare no kwitangira igihugu, maze Gen James Kabarebe asubiza ko iyo gahunda ari nziza kandi ko harimo gutekerezwa uburyo izashyirwa mu bikorwa.
