Abakozi ba SACCO ya Kabarore mu Murenge wa Kabarore mu Karere ka Gatsibo, barimo umucungamutungo wayo witwa Mukabaramba Françoise na Manager wayo witwa Umuhoza Jacqueline barakekwaho kuyiba Miliyoni 37 z’amafaranga y’u Rwanda.
Umuvugizi w’Urwego rw’Igihugu rw’Ubugenzacyaha,RIB, Dr Murangira B. Thierry yavuzeko taliki 26 Gicurasi 2023,iyi SACCO ya Kabarore yibwe Miliyoni 37, iperereza rihita ritangira gukorwa.
Avuga ko mu gutangira gukora iperereza hahise hatabwa muri yombi uwari Manager w’iyi SACCO, witwa Umuhoza Jacqueline.
Yagize ati “Hibwe amafaranga agana na Miliyoni 37, bikaba bikekwa ko yibwe na Mukabaramba Françoise, wari umucungamutungo, akaba yari yasigariyeho Umuyobozi wayo.”
Akomeza agira ati “Iperereza ryahise ritangira, hakaba hatawe muri yombi uwari Manager wayo, Umuhoza Jacqueline, naho Mukabaramba Françoise akaba agishakishwa.”
Uwafashwe afungiye kuri Sitasiyo ya RIB ya Kabarore mu gihe iperereza rikomeje, hakaba hanashakishwa Mukabaramba Françoise watorotse.
RIB kandi irasaba umuntu wese waba uzi aho Mukabaramba aherereye ko yayimenyesha cyangwa akamenyesha Polisi, kugira ngo nawe afatwe agire ibyo abazwa.