Ikipe y’Igihugu y’Abatarengeje imyaka 20 yerekeje muri Tanzania aho yitabiriye amarushanwa ya CECAFA U20 ari na yo azatanga amakipe abiri azahagararira Akarere mu Gikombe cya Afurika mu batarengeje imyaka 20.
Mu rukerera rwo kuri uyu wa Gatanu, tariki ya 4 Ukwakira 2024, ni bwo aba basore bahagurutse i Kigali berekeza i Dar es Salaam, hari nyuma y’amasaha make Umutoza w’Amavubi U20, Eric Nshimiyimana, atangaje urutonde rw’abakinnyi 19 azifashisha muri iyi mikino.
Amavubi U-20 ari mu itsinda rya mbere ririmo ibihugu byo mu Karere bisanzwe bimenyerewe mu mikino y’abato nka Kenya, Tanzania iri mu rugo ndetse na Sudani yari yakiriye irushanwa nk’iri mu 2022, icyo gihe u Rwanda ntirwitabiriye.
U Rwanda ruzatangira rukina na Sudani tariki ya 8 Ukwakira, rukurikizeho Kenya tariki ya 10 Ukwakira mbere yo guhura na Tanzania tariki 13 uko kwezi, rukazasoreza kuri Djibouti tariki 15 Ukwakira 2024.
Iyi mikino izabera ku bibuga bitatu birimo Azam Complex, KMC Stadium na Major General Isamuhyo Stadium zihereye mu Mujyi wa Dar es Salaam muri Tanzania.