Abahinzi b’imboga n’imbuto bo mu Ntara y’Amajyaruguru baravuga ko umusaruro wabo wangirikiraga ku muhanda biturutse ku bwinshi bw’umusaruro hakiyongeraho kubura abaguzi, kuri ubu bizeye ko ikibazo cy’iyangirika ry’umusaruro kigiye kuvugutirwa umuti.
Nyirantibibuka Annonciata ubarizwa muri Koperative Hagurukana Umwete ihinga imboga n’imbuto mu Karere ka Musanze mu Murenge wa Muko, asobanura uko umusaruro wabo wangirikaga.
Agira ati: “Bidutera igihombo iyo wasaruye imboga zikamara kabiri zitagurishijwe ubwo igihombo kiba kinjiye ariko wagize amahirwe ukagira aho uzibika ntabwo zahomba n’ejo wazigurisha nta kibazo zigize.
Twagiraga ikibazo cy’umusaruro tukeza ariko ntitubone aho tugurisha.”
Akomeza avuga ko ikibazo bari bafite kigiye kubonerwa umuti bityo ko isoko bazubakirwa mu cyanya cy’inganda i Masoro rizaba ari igisubizo ku bahinzi b’imboga n’imbuto.
Ati: “Iri soko rizadufasha kugira umusaruro urambye kuko niba imboga zimara kabiri, zikaba zizamara nk’icyumweru ntabwo wa musaruro wasubira inyuma kuko twanazigurisha zimeze neza.”
Uwanyagasani Jeannette wo mu Murenge wa Gashenyi mu Karere ka Gakenke, yahamirije Imvaho Nshya ko umusaruro wababoreragaho.
Ati: “Umusaruro watuboreragaho kubera ko tutari twakarebye kure.”
Tuyishime Yvonne wo mu Karere ka Rulindo mu Murenge wa Bushoki akaba ari umuhinzi w’imboga, na we ahamya ko umusaruro w’imboga wabangirikiragaho.
Agira ati: “Twebwe dukorera mu matsinda, umusaruro wangirikaga wabaga ari nk’ibiro nka 400 cyangwa 500 kuko ntabwo imboga bari bakamenye kuzirya cyane.”
Akomeza avuga ati: “Twari dufite umusaruro ukangirika kubera ko tutari dufite abaguzi ariko umushinga Kungahara waje kubona abaguzi byaroroshye.”
Eddy Frank Rugamba, umuyobozi wa kimwe mu bigo bishyira mu bikorwa imwe mu mishinga ya Kungahara iterwa inkunga n’Umuryango w’Ubumwe bw’Ibihugu by’u Burayi (EU), ahamya ko mu gihe gishize habagaho itakara ry’umusaruro.
Agira ati: “Cyane cyane muri uru ruhererekane nyongeragaciro rw’imbuto, imboga n’ibirayi habaho ikibazo cy’itakara ry’umusaruro mwinshi aho imibare itwereka ko kugeza ku kigero cya 30% cy’umusaruro watakaraga.”
Guverineri w’Intara y’Amajyarugu, Mugabowagahunde Maurice, yavuze ko umushinga Kungahara uterwa inkunga na EU mu guteza imbere ubuhinzi bw’imboga n’imbuto n’ubuhinzi bw’ibirayi, hari ibyo ugiye gukemura nko gushakira isoko abahinzi.
Ati: “Hari ubwo tuba twagize umusaruro mwiza ariko ugasanga bitubereye ikibazo, ugasanga umuturage za mvune yashyizemo bitumye umusaruro we awugurishije ku mafaranga make.
Ariko nanone tukabona mu mibare umusaruro w’imboga n’imbuto wangirika vuba, tukifuza gufata ingamba zituma abahinzi bacu bahinga, bakihaza mu biribwa bagasagurira n’amasoko ariko n’umusaruro ntubapfire ubusa.”
Isoko ryitwa Kigali Whole Sale Market (KWSM), rizubakwa mu buryo bugezweho, Guverineri Mugabowagahunde avuga ko rizaba igisubizo ku musaruro w’imboga n’imbuto wangirikiraga ku muhanda.
Ati: “Iri soko rishya rirebana n’imbuto n’imboga rizadufasha kujya tunahana amakuru, tukamenya niba Musanze cyangwa Burera twejeje ibitunguru byinshi kandi mu tundi Turere nka Ngoma cyangwa Kirehe babikeneye ayo makuru tuyamenye, dushakire abaturage bacu isoko ariko tunagire ikoranabuhanga ridufasha kuba twabika umusaruro mu gihe kirambye kandi ubitse neza kugira ngo udakomeza kwangirika.”
Emmanuel Kayitana, umuyobozi wa FXB Rwanda, asobanura ko umushinga Kungahara ugamije kongera umusaruro no gufasha Abahinzi ku buryo ibyangirika nyuma y’umusaruro biba bikeya.
“Ikigenderewe kirushijeho ni ukugira ngo umusaruro ubone isoko. Ku muhanda habaga hari ibitunguru byeze ariko byabuze ababigura ku gihe, mukabona kaloti zeze mu bice bya Nyabihu, zeze ariko nta baguzi bafite bahagije.
Iri soko rero dushaka ngo abahinzi bose babone, ni isoko ryizewe noneho ryo kugira ngo ibizahingwa byose byongerewe ubwiza bibashe kugera ku isoko kandi bizeye ibiciro byiza kubera ko bazaba bafitanye amasezerano na rya soko.”
Christophe Ayabagabo, Umukozi ushinzwe ibikorwa muri Kilimo Trust by’umwihariko akaba ari umuyobozi w’Umushinga Kungahara mu Karere ka Musanze na Nyabihu, avuga ko bashaka gukemura ikibazo cy’iyangirika ry’umusaruro bijyanye nuko abahinzi bakorera hamwe.
Ati: “Twifuza ko abahinzi barushaho kwibumbira hamwe bityo umusaruro wabo ukabasha kuboneka ari mwinshi kandi ukaboneka bakawugiraho n’ijambo.”
Isoko ryitwa Kigali Whole Sale Market (KWSM), rizubakwa mu buryo bugezweho rigatwara Miliyoni 46 z’ama Euro (asaga Miliyari 65Frw), rizubakwa i Masoro mu Mujyi wa Kigali, rikazaba rifite ubushobozi bwo kwakira Toni ziri hagati y’ibihumbi 260 na Toni ibihumbi 350 z’umusaruro, ungana na 70% by’Imboga n’Imbuto biribwa mu Mujyi wa Kigali.
