Ambasaderi w’u Rwanda muri Ghana, Rosemary Mbabazi yasabye Abanyarwanda baba mu mahanga kurangwa n’imyitwarire myiza, guhesha ishema igihugu cyabo no gukoresha amahirwe bafite mu guteza imbere u Rwanda n’imibanire yarwo n’ibindi bihugu.
Yabitangaje mu nama ya mbere ya Unity and Resilience Forum, yabereye i Abidjan muri Côte d’Ivoire, yari ifite insanganyamatsiko igira iti: “Ubumwe n’Ubudaheranwa: Ni amahitamo yacu.”
Iyi nama yahuje Abanyarwanda baba mu mahanga baturutse mu bihugu bitandatu, abafatanyabikorwa baturutse mu Rwanda n’inshuti z’u Rwanda. Yabaye kandi umwanya wo kungurana ibitekerezo ku ruhare Abanyarwanda baba mu mahanga bashobora kugira mu iterambere ry’igihugu.
Mu butumwa yahaye abitabiriye iyi nama, Ambasaderi Mbabazi yabibukije ko aho batuye n’aho bakorera hose bahagarariye u Rwanda. Yagize ati: “Aho mujya hose, muba muri ba ambasaderi b’u Rwanda.”
Yongeyeho ko abantu barenga 200 bitabiriye iyi nama bashobora kugira uruhare rukomeye mu iterambere ry’igihugu igihe ibitekerezo byabo byashyirwa mu bikorwa.
Yasabye Abanyarwanda baba mu mahanga guhuza amahirwe n’iterambere ry’u Rwanda
Ambasaderi Mbabazi yavuze ko u Rwanda n’ibihugu bitandatu byahagarariwe muri iyi nama bifitanye umubano mwiza, ushingiye ku bufatanye n’amasezerano atandukanye, ndetse n’imikoranire y’abakuru b’ibihugu.
Yasabye Abanyarwanda baba muri Côte d’Ivoire by’umwihariko kugira uruhare mu gufasha kurushaho gushimangira uwo mubano, bakoresheje amahirwe babona mu Gihugu batuyemo.
Yagize ati: “Mufite amahirwe. Mujye muyagarura mu Rwanda. Twifuza abafatanyabikorwa benshi hano. Twifuza ko ikoranabuhanga n’ubumenyi byimuka.”
Yabasabye kuba ikiraro gihuza u Rwanda na Côte d’Ivoire, ku buryo habaho imikoranire irushijeho gukomera mu bucuruzi, ishoramari, ikoranabuhanga no gusangira ubumenyi.
Yabasabye kwamamaza ibikorerwa mu Rwanda
Ambasaderi Mbabazi yanashimangiye uruhare rw’abikorera mu iterambere ry’igihugu, asaba Abanyarwanda baba mu mahanga gushyigikira ubucuruzi bw’Abanyarwanda bagura ibikorerwa mu gihugu kandi bakabimenyekanisha mu mahanga.
Yagize ati: “Mugure ibikorerwa mu Rwanda kandi murwamamaze.”
Yavuze ko Abanyarwanda baba mu mahanga ari abafatanyabikorwa b’ingenzi mu rugendo rw’iterambere ry’igihugu, ashimangira ko gutegura ejo hazaza hagomba no kuzirikana inyungu z’urubyiruko n’ibiragano bizaza, nk’uko biteganywa muri gahunda y’Igihugu y’Icyerekezo 2050.
Iyi nama yatangijwe n’ibiganiro byahuje inzobere n’abafatanyabikorwa, hanatangwa ibisobanuro ku mahirwe y’ishoramari binyuze mu Kigo cy’Igihugu gishinzwe Iterambere (RDB), ndetse hanamurikwa ibicuruzwa bikorerwa mu Rwanda.
Ambasaderi Mbabazi yavuze ko iyi nama ari intangiriro y’ibikorwa bigamije guhindura ibitekerezo n’ibiganiro amahirwe afatika, ashimangira ko hari byinshi byitezwe mu bikorwa bizakurikiraho.
