Minisiteri y’Uburezi (MINEDUC) n’ibigo biyishamikiyeho bibutse ku nshuro ya 32 Jenoside yakorewe Abatutsi mu 1994, by’umwihariko abari abakozi bayo 77 bazize Jenoside, iha abarezi umukoro wo guhora bari maso bakirinda ko ingengabitekerezo ya Jenoside yagaruka mu mashuri.
Minisitiri w’Uburezi Nsengimana Joseph yabigarutse muri icyo gikorwa cyabaye kuri uyu wa Kane, tariki ya 16 Mata 2026, hibukwa abo bakozi bahoze bakora mu yahoze ari Minisiteri y’Amashuri Abanza n’Ayisumbuye (MINEPRISEC) na Minisiteri y’Amashuri Makuru, Ubushakashatsi n’Umuco (MINESUPRES) n’abakoraga mu icapiro rya Imprimerie Scolaire.
Icyo gikorwa cyabanjirijwe no gushyira indabo ku kimenyetso kiri ku cyicaro cya MINEDUC, kiriho urutonde rw’amazina y’abayikoreraga bishwe, gikomereza ku Rwibutso rwa Jenoside yakorewe Abatutsi rwa Kigali ruri ku Gisozi, ahashyinguwe imibiri isaga ibihumbi 250.
Minisitiri Nsengimana Joseph yagaragaje ko amateka y’u Rwanda agaragaza ko hari igihe uburezi bwakoreshejwe mu kwica u Rwanda hakigishwa ivanguramoko mu mashuri ryagejeje kuri Jenoside yakorewe Abatutsi mu 1994.
Nsengimana yavuze ko abayoboye itegurwa rya Jenoside yakorewe Abatutsi mu 1994, bari abantu bize, asaba abakora mu rwego rw’uburezi guhora bari maso no kwamagana ingengabitekerezo ya Jonoside.
Ati:”Bidusaba guhora turi maso tukirinda ko ingengabitekerezo ya Jenoside yongera kugaruka mu mashuri. Politiki mbi yagize uruhare mu guheza bamwe mu Banyarwanda mu mashuri no mu kazi, no gutoteza abanyeshuri n’abarimu.”
Yagaragaje ko bafite inshingano zo kurinda amateka no kurera urubyiruko ruzira ingengabitekerezo ya Jenoside, kandi hakigishwa amateka nyayo no gutoza indangagaciro y’ubumwe, ubupfura n’ubwubahane kugira ngo amashuri abe isoko ry’ubumenyi no kubaka umuntu wuzuye.
Minisitiri Nsengimana yongeyeho ko kuba abato n’urubyiruko bagomba kwibuka ari umwanya wo kumenya aho Igihugu cyavuye no gutegura aho kigana binyujijwe mu ndangagaciro z’Ubunyarwanda.
Yagaragaje ko u Rwanda rushyize imbere uburezi budaheza buzira ivangura iryo ari ryo ryose, yihanangiriza urubyiruko ko nta shingiro rufite yo gukurana ingengabitekerezo ya Jenoside, ahubwo bagomba kubyaza umusaruro amahirwe ari mu gihugu.
Yagize ati:” Mufite amahirwe akomeye yo gukurira mu gihugu gifite amahoro n’iterambere kizira amacakubiri, ayo mahirwe akwiye kubabera ishingiro yo guhitamo icyiza. Ntimwabaye mu mateka mabi yatugejeje kuri Jenoside yakorewe Abatutsi; bityo nta mpamvu n’imwe mufite yo gukurana ingegabitekerezo yayo.”
Minisitiri Nsengimana yasabye abarimu bakiri urubyiruko gukomeza gusobanukirwa neza amateka ya Jenoside yakorewe Abatutsi kugira ngo bashobore kuyigisha, ndetse abashakashatsi bagakomeza kuyandika kugira ngo arusheho kumenyekana.
Yasabye ababyeyi ko bagira uruhare mu burezi n’uburere bw’abana agaragaza ko ari amahirwe akomeye kuba u Rwanda rufite abanyeshuri hafi miliyoni 5; ibyo bituma abarezi babakebura kandi bakabigisha neza kugira ngo aho uburezi bwakoreshejwe mu kwica u Rwanda bukoreshwe mu kurukiza.
Yagaragaje ko nubwo u Rwanda rukataje mu iterambere no kubaka uburezi nk’ishingiro ry’ubukungu ariko hakigaragara ingengabitekerezo ya Jenoside hirya no hino mu gihugu ariko cyane cyane mu bihugu byo mu Karere u Rwanda ruherereyemo; yerekana ko hakenewe uruhare rwa buri wese mu kuyirwanya.
Yongeyeho ati:” Turasaba buri wese kwiha inshingano yo kwamagana abagoreka amateka, abakoze Jenoside n’abakomeje guhembera ubwicanyi bagomba kugaragazwa kandi bakagezwa imbere y’ubutabera.”
Minisitiri Nsengimana yashimye abarokotse Jenoside yakorewe Abatutsi ku budaheranwa no gufatanya n’abandi kubaka u Rwanda bagaragaza ndetse ashimira n’ubutwari bw’Ingabo zahoze ari iza FPR Inkotanyi zahagaritse Jenoside yakorewe Abatutsi mu Rwanda, ubu rukaba rutekanye.
