Yabigarutseho i Londres mu Bwongereza, kuri uyu wa Mbere, mu nama yateguwe n’ishyirahamwe “Eastern Africa Association,” aho yagaragaje ko “iterambere rirambye rya Afurika risaba amasoko y’imari akomeye, ubufatanye mu rwego rw’imari n’amategeko yorohereza ishoramari.”
Busingye yashimangiye ko gukoresha igishoro gikomoka muri Afurika byafasha gutera inkunga imishinga y’iterambere, cyane cyane iy’ibikorwaremezo, kugabanya icyuho cy’amafaranga akenewe no kongera ubushobozi bw’ibihugu byo kwigira mu bukungu.
Ibiganiro byibanze ku buryo umutungo w’ibigega by’izabukuru, amafaranga y’Abanyafurika baba mu mahanga n’amasoko y’imigabane yo mu karere byakoreshwa mu gukusanya igishoro mu mafaranga akoreshwa mu bihugu by’akarere, hagamijwe gutera inkunga ibikorwa by’iterambere.
Iyi nama yahuje abayobozi n’inzobere mu rwego rw’imari n’inzego zigenzura ishoramari, baganira ku buryo bwo kunoza imikorere y’amasoko y’imari no kongera ubushobozi bw’Afurika bwo kwifashisha umutungo wayo mu kwiyubaka.
