Minisiteri y’Ubuhinzi n’Ubworozi MINAGRI yashyize hanze amabwiriza agenga ibiciro by’inyongeramusaruro birimo ifumbire n’imbuto aho bigaragara ko byiyongereye ugereranyije n’iby’umwaka ushize.
Minisitiri w’Ubuhinzi n’Ubworizi Dr Ndabamenye Telesphore yasabanuriye itangazamakuru kuri uyu wa Kane tariki ya 2 Nyakanga 2026, ko gushyira hanze ayo mabwiriza bishingiye ku kwitegura igihembwe cy’Ihinga cy’Urugaryi hakirikare.
Ayo mabwiriza agaragaza ko ibiciro by’ifumbire byiyongereye ugereranyije n’uko byari bimeze mu mwaka utaha ahanini bishingiye ku bibazo byatewe n’Intambara iri mu Burasirazuba bwa hagati.
Imibare ya MINAGRI igaragaza ko igiciro cy’ifumbire ya Urea cyavuye ku mafaranga 1 190 y’u Rwanda, ku kiro kigera ku mafaranga 1 980 ku kiro kimwe (inyongera ya 66%); ni mu gihe ifumbire ya NPK 17*3 (Compound) yavuye ku mafaranga 1 369 ku kiro igera ku mafaranga 1 861 ku kiro (inyongera ya 36%); naho ifumbire ya NPK 17*3 (Blend) iva ku mafaranga 1,330 ku kiro igera ku mafaranga 1 780 ku kiro (bingana n’inyongera ya 34%).
Ifumbire ya DAP yavuye ku mafaranga 1 693 ku kiro kimwe igera ku mafaranga 1 950 ku kiro kimwe (inyongera ya 15%).
MINAGRI yatangaje ko iri zamuka ry’ibiciro by’ifumbire rikaba ahanini ryaratewe n’intamabara hagati ya Iran, America na Israel; izamuka ry’ibiciro bya gaz ikoreshwa mu gukora ifumbire; izamuka ry’ibikomoka kuri peteroli byateye izamuka ry’ikiguzi cy’ubwikorezi; hamwe n’igabanuka ry’agaciro k’ifaranga (Frw) ugereranije n’idolari ry’America (USD),
Minisitiri Dr Ndabamenye yahamije ko ibyo biciro ari iby’agateganyo ariko Guverinoma y’u Rwanda yizeye ko mu mezi abiri ari imbere bizaba byagabanyutse hashingiwe ku buryo iyo ntambara irimo gushakirwa uburyo ihagarikwa.
Yagize ati: “ Ni ibiciro bigenerwa n’ibiba biri mpuzamahanga hari ibikoresho bikora ifumbire bituruka kure na hano mu Karere.
Kubera ko izi mpinduka z’ibiciro ziri ku rwego rw’Isi twihaye amezi atandatu, ariko bitabujije ko uko tuzabona ibiciro bigenda bihinduka tuganira n’abafatanyabikorwa kugira ngo bijyane n’ibiri ku isoko.”
Ibihingwa Leta izunganira ku ifumbire mvaruganda mu gihembwe cy’ihinga cya 2027A, ni ibi bikurikira: ibigori, ibishyimbo, ingano, soya, umuceri, ibirayi, imyumbati, urutoki, imboga n’imbuto.
Mu gihembwe cy’ihinga cya 2027A, nkunganire ya Leta ku kiguzi cy’ifumbire mvaruganda izatangwa ku buryo bukurikira: DAP: 46%; UREA: 45%; NPK 17-17-17: 43%, Kynoplus (Coated Urea): 45%; KCL/MOP: 36%; Micro-nutrient Fertilizers na Blends: 18% .
Abahinzi bazagura ifumbire mvaruganda ku bacuruzi b’inyongeramusaruro (Agrodealers) bo mu Mirenge yabo ku giciro cyunganiwe na Leta ku buryo bukurikira.
Itangwa ry’imbuto z’indobanure zunganiwe na Leta
Ibihingwa Leta izunganira ku mbuto z’ indobanure zituburirwa imbere mu gihugu mu gihembwe cy’ihinga cya 2027A ni Ibigori, Soya n’Ingano.
Ibigo by’Abikorera makumyabiri na bitandatu (26) bikurikira, bifitanye amasezerano n’Ikigo Gishinzwe Iterambere ry’Ubuhinzi n’Ubworozi mu Rwanda (RAB) ni byo byonyine byemerewe kugurisha imbuto z’indobanure ku bahinzi muri gahunda ya Nkunganire ya Leta mu gihembwe cy’ihinga cya 2027A.
Minisitiri Dr Ndabamenye yasabye abahinzi kwitabira kwiyandikisha muri gahunda yo kubona inyongeramusaruro hakiri kare kugira ngo bitegure guhinga muri Nzeri 2026.
