Abarokotse imyuzure ikomeye yibasiye uduce two ku mupaka wa Nepal n’u Bushinwa bakomeje kugera ahantu hizewe, mu gihe imiryango y’abantu hafi 3,000 baburiwe irengero ikomeje gutegereza amakuru y’abo mu miryango. Abatabazi bakomeje gushakisha abarokotse, nubwo imisozi miremire n’imyobo migufi biri mu bikomeje kubangamira ibikorwa byo gutabara.
Ibikorwa byo gushakisha no gutabara abaturage byari bigeze ku munsi wa kane kuri uyu wa Gatandatu, nyuma y’imyuzure ikomeye yibasiye uduce two ku mupaka wa Nepal n’u Bushinwa, igahitana abantu 676 muri Nepal na Tibet.
Nyuma yo kuvugurura imibare, abayobozi ba Nepal batangaje ko abantu 669 bamaze gupfa, mu gihe abandi 2,426 baburiwe irengero. Ku ruhande rw’u Bushinwa, abantu barindwi barapfuye, naho abarenga 550 ntibaraboneka.
Kugeza ubu, muri Nepal honyine hamaze gutabarwa abantu barenga 3,700.
Mu bigo byakira abakuwe mu bice byibasiwe n’ibiza, bamwe mu barokotse bakomeje kuhagera, mu gihe imiryango y’ababuriwe irengero ikomeje gutegereza amakuru yababo baburiwe irengero.
Abatabazi bakomeje kugeza abarokotse ahantu hizewe
Mu karere ka Nuwakot, kamwe mu duce twangijwe bikomeye n’imyuzure, kajugujugu zakomeje kugenda zizana imfashanyo zirimo imyenda, makaroni zihita zitekwa, ibisuguti n’umuceri.
Izindi kajugujugu zasubiraga mu bice byibasiwe n’imyuzure zitwaye abarokotse zibajyana ahantu hizewe.
Umusaza yamanukijwe buhoro muri imwe muri izo kajugujugu, mu gihe umusirikare yari ahetse umukecuru amujyanye ku ihema ryagenewe kuvurirwamo abarwayi. Abenshi mu batabawe ntibari bafite ikindi kintu uretse imyenda bari bambaye.
Abantu bagera kuri 12 bamanutse muri indi kajugujugu, abasirikare bitwaje abana bato, barimo n’impinja, bari barakuwe mu bice byibasiwe n’imyuzure.
Abaturage basubira mu ngo zasenywe n’imyuzure
Mu gihe ibikorwa byo kwimura abaturage byakomeje muri Trishuli, bamwe mu baturage basubiraga mu midugudu yabo kureba niba hari icyo bashobora kurokora mu byasigaye by’ingo zabo.
Umwana umwe yasohotse muri uwo mudugudu ahetse sandali zari zuzuyemo ibyondo, azikuye mu rugo rwabo.Umugore witwa Shoba Shretha na we yasubiye mu rugo gushakisha imbwa ye yitwa Sweetie, yari yarasize inyuma ubwo imyuzure yatangiraga.
Hari igihe abahuzabikorwa b’ibikorwa by’ubutabazi basabye abaturage, abanyamakuru n’abakorerabushake kuva ku muryango winjira muri Trishuli, nyuma y’uko imashini zicukura zinjiye muri uwo mudugudu kugira ngo zitangire gukuramo ibyondo n’ibindi byangiritse.
Imiryango itangira gutakaza icyizere
Mu murwa mukuru wa Nepal, Kathmandu, bene wabo n’inshuti z’abantu baburiwe irengero bakoraniye hanze y’ibitaro bikuru bya Leta kuva mu gitondo kare, bashakisha amakuru y’abo baburiwe irengero.
Benshi bagendaga hagati y’aho batangira gutangirwaho amakuru n’aho ibitaro byashyizeho urutonde rw’abarwayi, bafite amafoto y’abo babuze kandi basoma urutonde rw’abakomeretse bizeye ko bashobora kubabonaho.
Dil Maya Lama yari ahagaze hanze y’aho batangira amakuru, arira mu gihe yashakishaga murumuna we w’imyaka 26 wari umushoferi w’ikigo cy’amashanyarazi akomoka ku mbaraga z’amazi, ukorera mu karere ka Rasuwa.
Yari yaturutse i Ramechhap, ku ntera ya kilometero hafi 130 uvuye i Kathmandu.Ati: “Naje hano nizeye ko nshobora kumubona. Nta makuru mfite kuri we.”
Nelza Moktan na we yashakishaga amakuru ya mubyara we wabuze, na we wakoraga nk’umushoferi muri Rasuwa.Ati: “Numva nta cyizere ngifite. Hashize iminsi ine yose.”
Imiryango y’abantu baburiwe irengero yari yuzuje inkuta z’ibitaro ibyapa birimo amazina n’amafoto y’abo babuze ndetse na nimero za telefoni, mu rwego rwo gusaba amakuru yose ashobora gufasha kumenya aho ababo bari.
Abaturage bashakisha amazina y’ababo ku rutonde
Mu karere ka Nuwakot, abasirikare bari bashyize ku rukuta rw’ikigo cyakira abahuye n’ibiza impapuro zanditseho amazina y’abantu benshi baburiwe irengero.
Imiryango yabo yegeranaga kuri izo mpapuro, bamwe bagasoma amazina, abandi bagafata amafoto y’urutonde cyangwa bakihanagura amarira.Rajesh Kumar Ram yashakishaga cyane izina ry’umuhungu we.
Arira, yagize ati: “Ndacyafite icyizere ko wenda umuhungu wanjye yaba ari ahantu runaka. Birashoboka ko bamubona aho yaba yarafatiwe. Icyo ntegereje gusa ni uwo mwanya.”
Hanze, abantu banyuraga mu mihanda yari yuzuye ibyondo, banyura ku bimenyetso bigaragaza ubukana bw’ibi biza. Ku muhanda umwe, ikamyo yari yarafashwe n’ibyondo, igice cyayo cy’inyuma kikaba cyari cyazamutse mu kirere.
Priti Kharel yari ahagaze ku muryango w’ikigo cy’ingabo, afite icyapa kirimo ifoto ya murumuna we Milan Kharel, ukora nk’inzobere mu bijyanye n’ubumenyi bw’imiterere y’ubutaka muri Doosan Enerbility.
Umuryango we nta makuru yari wamubonyeho kuva imyuzure yatangira.
Kharel yagize ati: “Hashize iminsi ine.”
Yizera ko murumuna we ashobora kuba ari mu bantu bafatiwe mu mwobo uri ahakorerwa umushinga w’amashanyarazi akomoka ku mazi, aho abayobozi bamaze gutabara bamwe mu bari bawurimo.Ati: “Turashaka ko Leta imutabara vuba bishoboka.”
Imisozi miremire n’imyobo migufi bigora abatabazi
Mu kiganiro n’abanyamakuru cyabaye ku wa Gatandatu, Minisitiri w’Ububanyi n’Amahanga wa Nepal, Shisir Khanal, yavuze ko Leta yakusanyije imbaraga n’ibikoresho byose ifite, ku bufatanye n’abafatanyabikorwa mpuzamahanga, mu bikorwa byo gushakisha, gutabara, gutanga imfashanyo no gusana ibyangijwe n’ibiza.
Yavuze ko icyihutirwa kurusha ibindi ari ugushakisha abantu bagikomeje kubura.Ati: “Iki ni cyo gihugu cyacu gishyize imbere muri iki gihe.”
Khanal yavuze ko ibikorwa byo gutabara bigoye kubera imisozi miremire kandi ihanamye ndetse n’imyobo migufi iri muri ako gace kibasiwe n’ibiza.
Leta ya Nepal yasabye ibihugu biyikikije ubufasha bwihariye mu bikorwa byo gutabara abantu bafatiwe mu myobo, gukoresha ikoranabuhanga rishobora kumenya abarokotse, gukora isuzuma ryihuse rya ADN no kubona ibyuma bikonjesha imirambo.
Itsinda ry’abantu 11 ryaturutse mu Buhinde, rifite ubuhanga mu gutabara abantu bafatiwe mu myobo, ryamaze koherezwa muri Nepal, mu gihe itsinda risa naryo rituruka mu Bushinwa ritegerejwe kuhagera.
Minisitiri Khanal yavuze ko Nepal imaze kwakira toni zirenga 57 z’imfashanyo ziturutse mu Buhinde, mu gihe indi mfashanyo ikomeje gutangwa n’u Bushinwa, u Buyapani, Australia ndetse n’ibindi bihugu.
Yavuze ko Nepal izakomeza gusaba ubundi bufasha bitewe n’ibikenewe bizagenda bigaragara uko isuzuma ry’ingaruka z’ibiza rikomeje.
BIGENIMANA Didier / IGIRE.RW
