Donald Trump wabaye Perezida wa Leta zunze Ubumwe za Amerika, yatangaje ko adashobora kuzitabira ikiganiro mpaka na Kamala Harris, cyari giteganyijwe mbere y’amatora yo mu Ugushyingo uyu mwaka.
Mu gihe Visi Perezida Kamala Harris, ari na we ugomba guhagararira ishyaka ry’Abademukarate (Democrats), ku mwanya w’Umukuru w’Igihugu, yemeye ubutumire mu kiganiro cya televiziyo ya CNN, giteganyijwe ku wa 23 Ukwakira, Trump uhagarariye Abarepubulikani, we yanze kuzakitabira, akavuga ko cyatinze cyane kandi kubera amatora yaramaze gutangira.
Abashinzwe ibikorwa byo kwiyamamaza bya Harris bavuga ko, niba koko Donald Trump yemeza ko yitwaye neza agatsinda mugenzi we mu kiganiro mpaka giheruka kubera muri Philadelphia mu ntangiriro z’uku kwezi, yari akwiriye kwemera ubu butumire.
Benshi mu babajijwe nyuma y’icyo kiganiro mpaka hagati y’aba bombi, bagaragaje ko bagikurikiye kandi ko bemeza badashidikanya ko Kamala Harris yarushije cyane mukeba we Trump.
Trump nyuma y’iki kiganiro cyabaye tariki 10 Nzeri, yavuze ko nta kindi azongera kwitabira.
Ku wa gatandatu ubwo yari ahitwa Wilmington muri Leta ya North Carolina, yongeye kwemeza ko ikiganiro mpaka giheruka ari we wagitsinze kandi ko ikindi kiganiro nk’iki cyatinze cyane.
BBC yatangaje bwana Trump, yavuze ko amatora yamaze gutangira, ndetse ashinja Harris ko ashaka ikindi kiganiro nk’uburyo bwo gushaka guterana amagambo nawe, bitewe n’uko akomeje gutsindwa cyane.
Jen O’Malley Dillon, ushinzwe ibikorwa byo kwamamaza Harris na Walz, mu itangazo ryashyizwe hanze ku wa gatandatu, yavuze ko Abanyamerika bakeneye undi mwanya wo kubona ikiganiro mpaka hagati ya Harris na Trump mbere y’amatora yo mu Ugushyingo.
Ku ruhande rwa Kamala Harris, abinyujije ku rubuga rwa X, yavuze ko avuga ko yakirije yombi ubutumire bw’iki kiganiro mpaka kandi yizeye adashidikanya ko na Trump azakitabira.
Bitaganyijwe ko abaturage ba Amerika bizitabira amatora y’Umukuru w’Igihugu, tariki 5 Ugushyingo 2024, aho bazihitiramo uzabayobora muri manda ikurikira ahagati ya Harris na Trump.
Byari Byitezwe ko Trump azongera guhangana na Biden nk’uko byagenze mu 2020, ariko muri Nyakanga ibintu byaje guhinduka ubwo Perezida Joe Biden, yatangazaga ko ahagaritse ibikorwa byo kwiyamamaza akiyemeza gushyigikira Visi Perezida we Kamala Harris.
Kugeza ubu uko ibintu bihagaze ndetse n’amatora akaba agenda yegereza, uretse ibyegeranyo bigenda bikorwa, bikagaragaza ko Madamu Kamala Harris aza imbere ya Donald Trump, kandi nabwo ibice bitari byinshi, biragoye kumenya ufite amahirwe menshi yo gutsinda aya matora yo mu Ugushyingo.