Umutwe wa AFC/M23 washinje Ihuriro ry’ingabo za Repubulika Iharanira Demokarasi ya Congo kugaba ibitero bikomeye ku mujyi wa Rubaya muri Teritwari ya Masisi, wifashishije indege zitagira abapilote ‘drones’
Ni mu butumwa bwo ku rubuga rwa X, Lawrence Kanyuka yanditse mu rukerere rwo ku wa Kabiri tariki ya 24 Gashyantare 2026.
Yavuze ko kuva saa munani n’iminota 43 za mu gitondo “Drones zo mu Ihuriro rya Kinshasa zarashe zitarobanura mu mujyi wa Rubaya ibyakuruye ubwoba mu baturage ndetse abasivili bagapfa.”
Radio Okapi yo yavuze ko kuva ku wa Gatanu wa tariki 20 Gashyantara abarwanyi bo mu mitwe ya Wazalendo irimo PARECO, Mai-Mai Lamuka, na Raia Mutomboki batangije ibitero bikomeye muri Teritwari ya Masisi by’umwihariko mu nkengero z’ibirombe bya Rubaya.
Iyi Radio yarenzagaho ikavuga ko abarwanyi bo mu Ihuriro y’imitwe ya Wazalendo bambuye AFC/M23 imidugudu umunani mu muhora wa Katoyi–Kibabi–Rubaya.
Aha i Rubaya habarizwa ibirombe birimo amabuye y’agaciro yo mu bwoko bwa Coltan ndetse ubutegetsi bwa Repubulika Iharanira Demokarasi ya Congo buherutse kuhashyira ku rutonde rw’ibanze rw’ibirombe bwemereye Amerika binyuze mu masezerano y’ubukungu yasinywe.
Umuhuzabikorwa wa AFC/M23, ushinzwe ibijyanye amategeko politiki na dipolomasi, Bertrand Bisimwa, yanditse kuri X ko kuva ubutegetsi bwa Congo bwasinya amasezerano y’ubukungu i Washington D.C bwakajije ubwirasi no kutubaha na busa inzira zo kugarura amahoro ahubwo bugakomeza umurongo wo kwica no kwangiza agahenge.
Ibyo bitero biravugwa mu gihe tariki ya 13 Gashyantare 2026, João Lourenço, Perezida wa Angola akaba yari n’Umuyobozi w’Umuryango wa Afurika Yunze Ubumwe yari yasabye agahenge gahuriweho ndetse impande zombi zirabyemera.
Bwakeye buri ruhande rushinja urundi kurenga ku isezerano.
