Abatuye ahitwa mu Isangano mu murenge wa Ndego mu karere ka Kayonza bavuga ko bamaze igihe nta mazi meza bafite ku buryo ayo kunywa nayo gukoresha barinda kujya kuvoma mu biyaga bikabagiraho ingaruka zirimo no kurwara zimwe mu ndwara ziterwa n’umwanda harimo nk’inzoka zo mu nda bakaba basaba ubuyobozi kubaha amazi
Nizeyimana Zacharie ati”Ni ikibazo kidukomereye cyane kuko tuvoma ikiyaga,nta robine zihari zarahabaga ariko imiyoboro yarapfuye.Bahora batwizeza ko bazaza kuyisana tukabona amazi ariko turategereza ntibikorwa”
Mugenzi we baturanye mu gasantere ko mu Isangano witwa Havugiyaremye Ramekin awe yemeza ko babangamiwe no kutagira amazi meza ati”Ikibazo cy ‘amazi kirakomeye kuko hari abantu bake bajya bagerageza gushakisha uko bakwirinda kunywa amazi y’ibiyaga ,ugerageje gushaka amazi meza ijerekani ayigura Magana atanu kuyavuye mu misozi mu karere ka Kirehe, bikaba ari ibintu buri wese atashobora kuko bihenze.ikifuzo ni uko hakorwa umuyoboro uzana amazi meza mu baturage cyangwa se hakabaho uburyo bwo gutunganya aya y’ibiyaga tukayanywa atunganyijwe bikaturinda indwara nk’ inzoka”
Kuri iki kibazo cy’ibura ry’amazi ,ubuyobozi bw’akarere ka Kayonza buvuga ko kigiye gucyemuka kuko hari imishinga y’amazi yamaze gukorerwa inyigo mu bice binyuranye by’akarere.Nyemazi John Bosco umuyobozi w’ akarere ka Kayonza ati”Ubu ngubu dufite ishusho y’ amazi mu karere hose ndetse hari imishinga turimo gushyira mu bikorwa muri uyu mwaka w ‘imihigo ahakorwa imiyoboro inyuranye nkuzaha amazi abaturage b’ imirenge ya Kabarondo ,Nyamirama na Ruramira n’undi uzaha amazi abatuye Kabare duhuriyeho na Water for people na Minisiteri y’ ibikorwa remezo kandi hari n’indi mishinga myinshi dufatanyamo n’ abafatanyabikorwa kugira ngo dukomeze kugeza ku baturage amazi meza “
Muri iyi sentere y’Isangano n ‘umurenge wa Ndego muri rusange ni ahantu hakunze kwibasirwa n’izuba ku buryo bakeneye amazi ku bwinshi nubwo hariyo ibiyaga byinshi byatangiye kwifashishwa mu kuhira imyaka byanakwiriye kwifashishwa mu kugeza ku baturage amazi meza.
umwanditsi igire.rw